Në Kuvendin Kombëtar të PD, Lulzim Basha ka folur sërish për atë që ai e ka quajtur “trekëndëshi i Bermudës”, duke nënkuptuar këtu Edi Ramën, Ilir Metën dhe Sali Berishën.
Nga podiumi i Kuvendit të PD, kryedemokrati Basha tha se partia e tij është e vendosur të shkërmoqë “trekëndëshin e Bermudës”, që sipas tij kanë në fokus interesat personale dhe jo mirëqenien e qytetarëve.
“Por Partia Demokratike nuk mund ta pranojë këtë kurrë. Ne jemi vendosur të përballemi me ata që prej dekadash besojnë se mbijetesa e tyre personale është më e rëndësishme se mirëqenia e popullit tonë, Partia Demokratike është e vendosur në shkërmoqjen e trekëndëshit të Bermudës dhe prodhimit të saj të fundit politik, regjimit të Edi Ramës përmes masakrës zgjedhore. Që ethshëm ka synuar të cënonte ekzistencën dhe qëndrueshmërinë e Partisë Demokratike. Nuk ia kanë arritur, e nuk do ta arrijë kurrë, sigurisht falë shumicës së anëtarëve dhe delegatëve të partisë sonë të mrekullueshme, që janë sot në këtë sallë e jashtë saj. Ne kemi pasur probleme të shumta, por krenohemi që jemi partia e Dhjetorit ’90, që i ka i mbijetuar 31 viteve lufte të ashpra kundër saj, nga e majta komuniste apo nga kollona brenda nesh, deri te tentativat e të korruptuarve apo krimit të organizuar për të na dobësuar, për të na demoralizuar apo për të çfunksionalizuar Partinë Demokratike”, tha Basha.
Më herët, Basha i kërkoi falje demokratëve për lejimin e rolit të rëndësishëm të Sali Berishës në PD përgjatë këtyre tetë viteve të fundit. Basha pranoi përgjegjësinë për këtë gjë duke theksuar se tani partia e ka një kryetar dhe duhet të ketë vetëm një kryetar.
Discussion about this post