Kryetari i Partisë Demokratike, Lulzim Basha, ka zhvilluar ditën e sotme një takim me zv.kryeministren e Kosovës, Donika Gërvalla. Sipas burimeve, ata diskutuan mbi rëndësinë që ka dialogu mes Kosovës dhe Serbisë, domosdoshmërinë e moscënimit të integritetit territorial dhe shtetëror të Republikës së Kosovës, unitetin politik me të cilin Kosova duhet të përfaqësohet në këtë dialog. Në këtë pikë Basha, ka shprehur të gjithë mbështetjen për Kosovën, deri sa ajo të marrë atë çka meriton.
Gjatë bisedës, kryedemokrati ka sulmuar sërish nismën “Ballkani i Hapur”, duke thënë se është një gabim i madhe dhe se Shqipëria nuk mund të ketë interes më të lartë se interesat e Kosovës në marrëdhëniet rajonale. Sipas Bashës, tha se nisma e Novisadit është konceptuar si makiazh i imazhit të Serbisë, ndërsa Beogradi siç dëshmojnë ngjarjet e këtyre javëve nuk ndahet nga fantazmat e së kaluarës duke risjellë platforma si ajo e “Botës Serbe’.
Ndër të tjera, bëhet me dije se Basha dhe Gërvalla kanë diskutuar edhe mbi Luginën e Preshevës, pasivizimin e adresave dhe diskriminimin që u bëhet shqiptarëve. Basha përsëriti qëndrimin e tij, se Shqipëria duhet të mbrojë dhe mbështesë fuqimisht interesat e shqiptarëve në Luginën e Preshevës dhe Serbi.
Basha e ka kundërshtuar që prej fillimit nismën “Ballkani i Hapur”, madje ka akuzuar Ramën se me këtë hap po thur plane me Serbinë dhe po i kthen krahët Kosovës. Kjo nismë ka nxitur përplasje edhe mes vetë kryeministrit të Kosovës, Albin Kurti, dhe kryeministrit Edi Rama. Kurti është shprehur i bindur se, nuk do bëhet kurrë pjesë e kësaj nisme.
