Kryetari i PD Lulzim Basha, në kuvendin zgjedhor të degës 6 të PD në Tiranë, në Kombinat, ka deklaruar se të njëjtit njerëz që lidhen me aferën Rama-McGonigal lidhen dhe me aferën e inceneratoreve.
Ai ka shtuar se PD është angazhuar t’i shkojë kësaj çështjeje deri në fund, ndaj javën e ardhshme do të depozitohen në SPAK 2 kallëzime penale, e para për rëfimet e Arben Ahmetaj dhe e dyta për lidhjen midis përfituesve nga inceneratorët, përfituesve nga afera McGonigal, që sipas tij çojnë tek i njëjti emër.
“Këtu ka kulmuar një skandal me dy konkluzione të rëndësishme. I pari që Shtetet e Bashkuara të Amerikës, janë Shtetet e Bashkuara të Amerikës. Kushdo që të jesh, vjen dita që jep llogari para drejtësisë. Dhe Charles Mcgonigal është dënuar me 2 vite e 4 muaj burg sepse mori para nga Edi Rama për të stisur hetime dhe akuza monstruoze ndaj kryetarit të Partisë Demokratike, ndaj opozitës, pa asnjë hezitim nga korruptuesi se me këtë po njollosej jo thjesht në mënyrë të padrejtë kundërshtarin e vet politik, por gjithë këtë vend, të gjithë qytetarët e këtij vendi. Charles McGonigal është dënuardhe për këtë pjesë të akuzës, ka dhe pjesën tjetër të akuzës që ka bashkëpunuar me oligarkët e Putinit, ka marrë para nga oligarkët e Putinit, ai do të shpenzojë jo pak por 6 vite e gjysmë në burgjet e Shteteve të Bashkuara të Amerikës. Ky është konkluzioni i parë. Edi Rama dhe të tijët duan as të mos e mendojnë konkluzionin e dytë. Konkluzioni i dytë është po çfarë bëhet me korruptuesin? Si ka mundësi që të njëjtët njerëz që lidhen me aferën Rama-McGonigal, lidhen dhe me aferën e inceneratorëve. Kjo na tregon se këtu kemi të bëjmë me një kompleks oligarko-kriminal, i cili nuk ka asnjë lidhje me qeverisjen, të mirë apo të keqe, të dobët apo të fortë. Por ka lidhje vetëm me përvetësimin, makutërinë dhe babëzinë të aseteve dhe pasurive të shqiptarëve. Dhe trajtimin si armik sipas kodeve kriminale të mafies, të çdokujt që i kundërvihet, e në veçanti Partisë Demokratike dhe lidërshipit të saj. Megjithatë aty ku përfundon rrugëtimi përçarës i McGonigal, para qelisë për 6 vite e gjysmë, nuk mbaron rrugëtimi i të tjerëve. Prandaj PD është angazhuar t’i shkojë kësaj çështjeje deri në fund. Por ne nuk jemi dhe nuk sillemi si kundërshtari ynë mjeran. Kjo nuk është dhe nuk do të jetë kurrë çështje e retorikës boshe të denoncojmë dhe të tregojmë me gisht, por do të kërkojmë që drejtësia të bëjë punën e vet. Ndaj java e ardhshme do të jetë një javë ku ndaj Edi Ramës PD do të depozitojë 2 kallëzime në SPAK. I pari bazohet mbi rëfimet e 2-shit të tij jetëgjatë, Arben Ahmetaj, se është vet ky kryeministër pronari i vërtetë dhe përfituesi kryesor i aferës së tmerrshme të inceneratorëve. Dhe kallëzimi i dytë do të jetë pikërisht lidhja midis përfituesve nga inceneratorët, përfituesve nga afera McGonigal që çon detyrimisht tek i njëjti person, tek i njëjti emër, tek i njëjti përgjegjës. Detyra jonë është t’i vëmë këto fakte para drejtësisë dhe detyra e drejtësisë është t’i zbardh në mënyrë profesionale me një hetim të thelluar, të paanshëmdhe objektiv shkeljet penale dhe përgjegjësitë ligjore për këtë aferë të tmerrshme”, tha ai.
Discussion about this post