Basha uron nga kulla e Isa Boletinit për Pavarësinë e Shqipërisë

Kryetari i Partisë Demokratike, Lulzim Basha ka uruar nga fshati Boletin i Mitrovicës 111-vjetorin e Pavarësisë së Shqipërisë.

Basha me disa deputetë demokratë kanë qenë në kullën e Isa Boletinit, një nga monumentet më historike të kombit shqiptar.

Sipas Bashës, Isa Boletini është një gur themeli në krijimin e shtetit shqiptar dhe krahu i djathtë i Ismail Qemalit.

“Gëzuar 28 nëntorin, ditën e pavarësisë së Shqipërisë, ditën e flamurit kombëtar.

Sot kemi zgjedhur ta festojmë këtë ditë nga një prej monumenteve më historike të kombit shqiptar, kulla e Isa Boletinit këtu në Boletin në veri të Kosovës.

Kemi zgjedhur ta festojmë duke nderuar një prej dy Isëve të mëdhenj, bashkë me Ismail Bej Vlorën, atin themelues të shtetit shqiptar, Isa Boletinin komandantin e parë ushtarak të shtetit shqiptar, dorën e djathtë ku mbështetej Ismail Qemali dhe veprimtarët e tjerë që mundësuan pavarësinë e Shqipërisë.

Fshati Boletin njihet për gurët e tij të mëdhenj, edhe Isa Boletini është një gur i madh në themelin e shtetit shqiptar.

Ai është një nga ata gurët që mbeten në ndërgjegjen tonë edhe si diçka për tu nderuar e krenuar, por edhe si paralajmërim për kundërshtarët e lirisë dhe pavarësisë të kombit tonë, se këta gurë qëndrojnë garanci e identitetit tonë kombëtar, e përkatësisë tonë evropiane, por të pavarura dhe me liri të pacenuara”, tha Basha.