Bashkia Sarandë ka vendosur që të shpallë vetëm disa ditë para mbylljes së vitit 2021, fituesin e një tenderi për të cilin ka hapur garën që në datën 31 mars të po këtij viti. Ndërsa në njoftim saktësohet se data e fundit për dorëzimin e dokumenteve nga ofertuesit është 12 prilli i vitit 2021, teksa po në të njëjtën ditë do të mbahej dhe tenderi ku do të shqyrtoheshin ofertat nga operatorët pjesmarrës në tender.
Tenderi me numër reference REF-91948-03-30-2021, ndonëse është zvarritur për shumë muaj me radhë sërish është dhënë pa garë nga Bashkia Sarandë, duke u klasifikuar me “red flag”. Tenderi ka si objekt blerje materialesh për mirëmbajtje të rrjetit të ndriçimit public, ndërsa fondi limit i akorduar për këtë investim është 3 333 333 ( tre milion e tre qind e tridhjetë e tre mijë e tre qind e tridhjetë e tre ) lekë pa TVSH ose 33 milionë lekë të vjetra. Kjo shumë e konsiderueshme parash i janë dhënë pa garë duke shkelur hapur ligjin e konkurrencës, operatorit “NIKA” shpk.
Ndërkohë në garën për këtë tender, marrëveshja e të cilit është përcaktuar të zgjasë një vit nga data e nënshkrimit të kontratës, ka marrë pjesë dhe operatori “ERVIN LUZI”, i cili është skualifikuar automatikisht nga gara, me argumentimin se nuk përmbush kriteret e DST-ve. Skualifikimi i këtij operatori lë të vetme në garë kompaninë “NIKA” sh.p.k, duke e shpallur automatikisht fituese pa garë.
Institucioni i drejtuar nga Adrian Guma është raportuar shpesh herë për shkelje të barazisë së garës në tendera dhe dhënien e tyre pa garë, duke favorizuar subjekte të caktuara.Tenderi në fjalë i dhënë në 16 dhjetor të vitit 2021 është marrë nga buxheti po i këtij viti, duke konsumuar kështu 33 milionë lekë të vjetra për një tender që në fakt është shpallur që në mars dhe është zvarritur, por sërish në fund është dhënë pa garë.
Discussion about this post