Kreu i Partisë së Lirisë, Ilir Meta, bëri të ditur sot fundin e koalicionit “Bashkë Fitojmë” që u krijua mes tij, Sali Berishës, Nard Ndokës dhe Vangjel Dules.
Në një intervistë për MCN TV, Meta tha se “Bashkë Fitojmë” bëri përpjekjet e tij më të mira, për atë kohë, për ato rrethana, tërësisht anormale, të sforcuara, që u krijuan.
“Për sa i takon së ardhmes, Partia e Lirisë është e gatshme të bashkëpunojë me Partinë Demokratike, ta sqaroj, me atë të Kuvendit të 11 dhjetorit dhe me çdo forcë tjetër politike”, tha Meta, duke lënë të hapur kështu mundësinë e bashkëpunimit me çdo pjesë të PD-së.
Meta shprehet se “Partia e Lirisë ka detyrimin për t’u përgatitur sikur do të hyjë vetëm në zgjedhjet e 2025″. Ndër të tjera, Meta thekson se çdo ristrukturim i forcave opozitare që ndihmon për të rritur efikasitetin dhe për të fuqizuar opozitën, është i vlefshëm”.
“Vlerësojmë çdo ristrukturim të forcave të tjera që ndihmon për të rritur efikasitetin dhe për të fuqizuar opozitën. Dhe natyrisht sa i përket koalicionit për të ardhmen, jemi ende në kohë, për të marrë vendimet e duhura dhe është detyra jonë që në çdo rast, të përgatitemi sikur do të hyjmë vetëm, Partia e Lirisë. Dhe natyrisht që ne kemi qenë dhe jemi të hapur për çdo bashkëpunim që maksimalizon rezultatin e opozitës.
Për ne, themelore, është ç’kapja e shtetit, rivendosja e demokracisë, fuqizimi i opozitës, por pa dyshim fuqizimin e Partisë së Lirisë, një parti stoike”, tha Meta.
Koalicioni “Bashkë Fitojmë” rezultoi një dështim total në zgjedhjet e 14 majit, pavarësisht akuzave për manipulimin e zgjedhjeve.
Discussion about this post