Adela Kondakçiu, bashkëpunëtore e drejtësisë në dosjen që lidhet me Erion Veliajn dhe një prej bashkëpunëtoreve më të afërta të Ajola Xoxës, ka paraqitur mbrojtjen e saj para Gjykatës së Posaçme (GJKKO).
Përmes avokatit të saj, Kondakçiu ka deklaruar se nuk ka pasur si qëllim përfitimin personal, ndërsa mbrojtja argumentoi se ajo ka pranuar përfshirjen në veprimtarinë e kundërligjshme nën ndikimin dhe urdhrat e Ajola Xoxës.
Sipas avokatit, Kondakçiu nuk ka përfituar nga kjo situatë, por ka bashkëpunuar me drejtësinë dhe ka kontribuar në zbardhjen e fakteve, duke mbajtur edhe kosto personale për transparencën e saj.
Në të njëjtën seancë, ish-polici i burgjeve Fatjon Baçi, i marrë i pandehur pasi i dha Erion Veliajt telefonin e tij për të kryer telefonata gjatë transferimit nga paraburgimi drejt gjykatës, kërkoi një dënim më të butë. Përmes mbrojtjes së tij, u pretendua se veprimi i Baçit ishte një “gabim njerëzor” ndaj një personi që në atë kohë kishte një pozitë të lartë publike. Avokatja deklaroi se Veliaj kishte kryer vetëm telefonata me familjarët dhe se Baçi nuk kishte pasur qëllim kriminal, duke kërkuar që gjykata të marrë parasysh edhe rrethanat familjare, pasi ai është i vetmi person i punësuar në familjen e tij.
Pas përfundimit të mbrojtjeve, avokatët kërkuan shtyrjen e seancës për të përgatitur konkluzionet përfundimtare. Prokuroria e kundërshtoi këtë kërkesë duke e cilësuar të padrejtë, por GJKKO vendosi shtyrjen e seancës për datën 23 korrik. Ndërkohë, për Ajola Xoxën dhe disa të pandehur të tjerë është pranuar gjykimi i shkurtuar dhe ata po gjykohen në një proces të veçuar nga ai i Erion Veliajt.
Discussion about this post