Bashkia e Durrësit do t’i jap “dhuratë” koncensionarit të Sharës, rreth 11 miliardë lekë të vjetra, për depozitimin e mbetjeve urbane të qytetit.
Bashkia e Durrësit ka hapur një ditë më parë (10 shtator) tenderin në fjalë me procedurë aspak transparente, “Me negocim, pa njoftim” dhe për më tepër pa asnjë dokument sqarues sesi do të përdoret kjo shumë e konsiderueshme parash.
Ndryshe nga një muaj më parë, pavarësisht se objekti i tenderit është po i njëjti, këtë herë shuma është 5-fishuar, ndërsa qyteti bregdetar prej ditësh vuan ndotjen mjedisore si pasojë e mos tërheqjes së mbeturinave urbane. Rrugët e qytetit dhe lagjeve periferike apo zonave rurale plot me pirgje mbeturinash ishin një fenomen i përsëritur përgjatë gjithë kohëzgjatjes së sezonit turistik.
Kryeministri Edi Rama, pak ditë më parë publikoi në rrjete sociale një video nga punimet që po realizohen tek “Eco Parku”, i ngritur aty ku deri rreth një vit më parë ishte venddepozitimi i mbetjeve urbane të Durrësit. Mbyllja e këtij venddepozitimi në mënyrë të nxituar dhe pa i dhënë zgjidhje më parë çështjes se ku do të depozitoheshin mbetjet urbane të Durrësit, krijoi jo pak herë ndotje mjedisore alarmante në qytetin bregdetar duke nisur nga qershori i vitit të kaluar e deri më tani.
Koncesionari duket se do të vazhdojë të gllabërojë nga taksapaguesit shqiptarë miliona lekë për mbetjet urbane, për më tepër që kontrata e koncesionit ka kohëzgjatje 10 vite.
