Në një njoftim të bërë publik, Bashkia e Fierit këshillon qytetarët të mos përdorin ujin e çezmës për konsum, pasi mund të jetë kontaminuar për shkak të përmbytjeve.
Bashkia thotë se uji duhet të përdoret vetëm për nevoja higjeno-sanitare, deri në një njoftim të dytë. Situata e krijuar nga vërshimi i lumit Vjosë ka sjellë probleme edhe në rrjetin e furnizimit me ujë.
“Të nderuar qytetarë! Pas kufizimit të furnizimit me ujë për shkak të situatës së krijuar nga vërshimi i lumit Vjosë dhe mbrojtjes së burimeve tona ujore, duke nisur nga nesër do të mundohemi të rikthejmë furnizimin me ujë. Kujdes! Uji duhet të përdoret vetëm për nevoja higjeno-sanitare. Uji nuk duhet të konsumohet deri në një njoftim të dytë. Situata e krijuar nga vërshimi i lumit Vjosë ka sjellë probleme edhe në rrjetin e furnizimit me ujë. Për këtë arsye edhe gjatë ditëve në vazhdim do të zbatojmë një grafik të reduktimit të orëve të furnizimit me ujë. Ndërkohë që po punohet intensivisht për rikthimin e normalitetit në këtë shërbim, kërkojmë mirëkuptimin tuaj!” – thuhet në njoftimin e Bashkisë Fier.
Kujtojmë se për shkak të reshjeve të dendura të shiut, lumi Vjosa ka dalë nga shtrati dhe ka përmbytur disa fshatra te Fierit.
Discussion about this post