Bashkia e Patos ka vendosur të mbyllë shkollën në fshatin Grizë, duke ngritur kështu në protestë banorët e fshatit. Mësohet se, Bashkia do t’i dërgojë fëmijët në një shkollë në Patos, me justifikimin se ky institucion ka pasur plasaritje në mure si shkak i tërmetit të 26 nëntorit.
Burime për Gijotina.com shprehen se në të vërtetë, shkolla do të kthehet në klub argëtimi për pensionistët, duke u privatizuar.
Banorët kanë reaguar të irrituar, pasi vendimi është marrë nga Këshilli Bashkiak Patos vetëm një ditë më parë.
“Pas tre muaj pushimesh që kishte kohë për rikonstruksionin e shkollës, dje morën një vendim dhe kanë njoftuar prindërit që fëmijët e Patozit do shkojnë në qytet sepse do t’i kalojë objektit privat dhe sipas disa burimeve ky objekt nuk do të kthehet shkollë sërish. Nuk kuptojmë pse këto vendime në kohë kaq të shpejtë. Kjo shkollë po ta shikosh brenda nuk ka çarje, e as plasaritje që të rrezikojnë objektin”, shprehen banorët.
Në fshatin Grizë të Patosit, janë 46 nxënës që ndjekin studimet në shkollë fillore, ndërsa 22 fëmijë që ndjekin parashkollorin.
