Edhe në rastet kur Bashkia e Tiranës e drejtuar nga Erion Veliaj nuk zhvillon vetë drejtpërdrejt tendera, e bën këtë gjë përmes institucioneve që ka në varësi. Ndonëse të kritikuara shpesh për shkak të mënyrës së përzgjedhjes së fituesit, prokurimet vijojnë të zhvillohen duke skualifikuar të gjithë operatorët konkurrues përveç fituesit
Në të njëjtën mënyrë është vepruar edhe nga Drejtoria e Përgjithshme e Rrugëve dhe Ndriçimit Publik Tiranë për blerjen e blerje hekur, profile, rrjetë gabion, tel xingato, tel bari etj.
Në një tender të zhvilluar në datën 1 nëntor të këtij viti, me numër reference REF-08993-10-21-2021, për procedurën me fond limit 5 397 321 lekë të reja, pjesëmarrëse rezultojnë 2 operatorë ekonomikë, “Kupa shpk” dhe “Mbjeshova shpk”, dhe është skualifikuar kjo e fundit.
Arsyeja e skualifikimit është se kompania në fjalë nuk përmbush kapacitetin profesional të operatorëve ekonomikë dhe nuk ka paraqitur sigurimin e ofertës.
Kështu i vetmi i kualifikuar dhe automatikisht edhe fituesi u shpall “Kupa shpk” me ofertën 5 195 000 lekë, me një diferencë shumë të vogël nga fondi limit prej vetëm 202 mijë lekësh.
As në këtë rast nuk ka munguar sinjalizimi nga Open Data e cila ka ndezur flamurin e kuq të shoqëruar me shkrimin “skualifikim i të gjithë operatorëve konkurrues përveç fituesit.”
Pronari i kompanisë “Kupa shpk”, është Shkëlqim Kupa, i cili është akuzuar nga mediat se vepron për llogari të pronarit të një prej televizioneve kombëtare të vendit. /Gijotina.com
Discussion about this post