Vetëm pak ditë pas denoncimit të plehrave në përroin e Manazderes në Elbasan, një tjetër skandal ka ndodhur në këtë bashki, ku në fshehtësi të plotë është zhvilluar një tender për pastrimin e qytetit.
Bashkia Elbasan ka zhvilluar me negocim të drejtpërdrejtë he pa konkurrencë një tender me objekt “Kryerja e Shërbimit të pastrimit për qytetin e Elbasanit”. Ky tender është realizuar pikërisht më 26 gusht, ku fitues është shpallur kompania “Victoria Invest SHP”, me vlerën 20.7 milionë lekë të reja pa TVSH.
Ajo që vihet re është se tenderi ka qenë i fshehtë dhe është bërë pa njoftim, por me negocim mes palëve, ndërkohë që me këtë tender, duket se bashkia socialiste ka afruar një nga njerëzit më të afërt të Lulzim Bashës, duke eliminuar një rrezik elektoral për këtë qytet.
Sipas të dhënave, kompania fituese rezulton në pronësi të biznesmenit Fatmir Kuçi, i cili njihet si mik shumë i afërt i kreut të opozitës Lulzim Basha. Në fushatën e vitit 2009, kur Basha udhëhiqte grupin e PD në Elbasan, arriti që me mbështetjen e Kuçit, të barazonte rezultatin e deputetëve 6 me 6 në këtë qark.
Tashmë duket se Bashkia Elbasan ka afruar këtë biznesmen me tenderin për pastrimin e qytetit, ndërkohë që nuk përjashtohet mundësia e një afrimi të mundshëm mes liderit demokrat me atë socialist, siç kanë qenë zërat e pak ditëve më parë, për një marrëveshje të fshehtë mes tyre.
Megjithatë, shqetësues dhe i dyshimtë mbetet fakti i realizimit të këtij tenderi në mënyrë të fshehtë nga ky institucion vendor, në një kohë që vlera e tij është tejet e lartë dhe flitet për kontratë 1-vjeçare. Gijotina.com
