Bashkia Tiranë ka vendosur të kufizojë orarin e lëvizjes gjatë ditës në kryeqytetet për automjetet e tonazhit të rëndë. Por, Shoqata e Ndërtuesve ka dalë kundër këtij vendimi. Më anë të një deklarate, shoqata kërkon që të lejohet lëvizja e mjeteve të përpunimit dhe transportit të betonit gjatë orarit të punës në Tiranë.
“Po ju drejtohemi, Juve, si titullari më i lartë i këtij institucioni për zgjidhjen e një problem aktual dhe shumë të rëndësishëm për ne : Lejimin e vazhdimësisë normale të punës për prodhimin dhe transportin e betonit, lejimin e lëvizjes së autobetonierave të sektorit të ndërtimit gjatë orarit të punës në Tiranë. (Punonjësit e Policisë Rrugore nuk po lejojnë lëvizjen e autobetonierave para orës 20.00 në qytetin e Tiranës)Theksojmë që ky ka qenë problem i përsëritur ndër vite për ne”, thuhet në deklartaë.
Shoqata bën të ditur se puna gjatë natës për to është e pamundur, pasi nuk ka ndriçim normal. Sipas tyre, betoni nuk është material i cili shkarkohet si inertet dhe përpunohet në një moment të dytë, si dhe shtojnë se transportimi bëhet me makineri të cilësuara si makina teknologjike (autobetoniere) dhe nuk përbëjnë rrezik për qytetarët. Përmes deklaratës, shoqata kërkon nga institucionet kompetente lejimin e vazhdimësisë të punës normale. “Duhet të sqarojmë se, për specifikat e betonit dhe rrezikshmërinë e lartë që paraqet ky lloj procesi, është e pamundur që të punohet natën në lartësi të mëdha dhe pa ndriçim normal. Gjithashtu, ekzistojnë edhe procese pune që detyrimisht duhet të vazhdojnë pa ndërprerje 12 (dymbëdhjetë) orë e më tepër. Lënia në gjysmë e një bazamenti, strukturave mbajtëse ose e soletave është teknikisht e ndaluar mbasi dëmton qëndrueshmërinë e objektit. Gjithashtu, betoni nuk është material i cili shkarkohet si inertet dhe përpunohet në një moment të dytë”, thuhet në deklaratë.
Pak javë më parë, përmes një udhëzimi që synon disiplinimin e trafikut në nisje të vitit 2022, sidomos në orët e para të mëngjesit, kur fëmijët shkojnë në shkollë, Bashkia Tiranë ka bërë të ditur se ka vendosur të ndalojë qarkullimin e mjeteve të rënda në brendësi të Unazës së Vogël të qytetit nga ora 07:00 e mëngjesit deri në orën 20:00 të mbrëmjes.
Discussion about this post