Ulja e temperaturave u pasua me reshje dëbore në shumë zona veriore të vendit, duke bërë që zona të ndryshme të izolohen për shkak të problemeve të qarkullimit me automjete dhe bllokimit të rrugëve. I tillë është dhe rasti i fshatit Velisht në Tropojë, zonë për të cilën organet kompetente nuk kanë marrë asnjë masë për zhbllokimin e qarkullimit dhe normalizimin e situatës.
Përballë kësaj situate, një qytetar 64-vjeçar ka marrë lopatën duke punuar vullnetarisht për pastrimin e dëborës, teksa hedh akuza ndaj Bashkisë Tropojë se nuk ka reaguar ndaj nevojës së banorëve të kësaj zone për të mos u izoluar.
“Nuk kemi ndihmë nga bashkia e Tropojës për 4 km rrugë. Pavarësisht kërkesave që kemi dërguar nuk reagojnë. Të dal të bëj detyrën e kuzhinierit, por të dal të hap edhe borën është e vështirë. Për moshën që kam, larg qoftë të na ndodhë ndonjë fatkeqësi si do të shkosh në spital? Nuk shkon dot.”
Ai shton gjithashtu se ky izolim i zonës po i dëmton biznesin, ndaj i është dashur të lërë punën si kuzhinier dhe të pastroj dëborën në mënyrë që të mos falimentojë.
“Unë në moshën time 64-vjeç burrë kam ardhur nga Tirana. Kam dy vite që punoj kuzhinier në një biznes në Bjeshkët e Tropojës. Dal hap rrugën që biznesi mos falimentojë pa na ardhur njerëzit. Klientela. Këtu është pikë turistike, me këto rrugë nuk vijnë dot sepse është normale, vetëm me tank me ardhur.”
Biznesmeni 64-vjeçar nënvizoi se pret të bëjë dozën e dytë të vaksinën, por rruga është e pakalueshme nga automjetet.
“Kam që në 30 nëntor me bërë vaksinën e dytë nuk shkoj dot sepse nuk zbret makina dot. Kujt ti lutem, bashkia është shumë indiference, as na ndihmon, as shikon, na kanë kthyer kurrizin. Kaq të paaftë janë këta” shprehet ai
Discussion about this post