Bashkia e Shkodrës ka dhënë sërish alarmin për përmbytje. Në një postim në Facebook, Bashkia u ka kërkuar qytetarëve të marrin masa pasi vendi do të përballet me mot të keq gjatë fundjavës dhe rajoni rrezikohet nga përmbytjet.
Sipas parashikimit që bëri IGJEUM për të shtunën dhe të dielën, lumenjtë Drin dhe Buna pritet që të dalin nga shtrati.
POSTIMI I PLOTË:
Të dashur banorë të Bashkisë Shkodër! Bazuar në parashikimet e IGJEUM, territori i Bashkisë Shkodër pritet të ketë këtë fundjavë reshje të shumta shiu si dhe reshje dëbore në zonat malore. Nga ana e Hidrocentraleve në Kaskadën e Drinit sipas raportimeve mund të ketë shkarkime, kjo bazuar në nivelin e prurjeve.
Shtabi i emergjencave të Bashkisë Shkodër është në gatishmëri për çdo situatë që mund të paraqitet. Ju lutemi banorëve të nënShkodrës të marrin masa, të kenë vemendje të shtuar, si dhe raportim sa më të shpejtë të problematikave që mund të shfaqen në këto njësi duke njoftuar në numrin e celularit: 067 303 5950.
Discussion about this post