Dorëheqja dhe arrestimi i kryebashkiakut të Tiranës Erion Veliaj u kërkua edhe këtë të enjte, në protestën e zhvilluar para bashkisë së kryeqytetit.
Protestat para bashkisë që janë zhvilluar në mënyrë periodike çdo javë, nisën pas arrestimeve të drejtorëve të Veliajt për dosjen e njohur si “5D”. Gjatë tubimeve, Veliaj është cilësuar “koka e bandës së drejtorëve hajdutë” dhe “pronari faktik i inceneratorit të Tiranës”.
Edhe këtë të enjte, përfaqësues të opozitës theksuan se protestat do të vijojnë deri në arritjen e objektivave, ndërsa përsëritën akuzat ndaj Prokurorisë së Posaçme për amnisti ndaj Veliajt.
“SPAK t’i thërrasë mendjes dhe të hapë sytë sepse qytetarët e din të vërtetën dhe nuk po dërgojnë përpara përgjegjësisë autorët e vërtetë të vjedhjes së shekullit me inceneratorët”, tha nënkryetari i Këshillit Bashkiak të Tiranës nga radhët e demokratëve, Dorian Teliti.
“Erion Veliaj duhet të kuptojë që jo ky Duman, por dymijë Dumanë të ketë ai, nuk shpëton dot nga vjedhjet që i ke bërë qytetarëve të Tiranës, – tha Klevis Balliu nga PD. – Për drejtorët e bashkisë që janë në burg, një pyetje kam për ata. A ju ka thënë Erion Veliaj juve se çfarë ka thënë në SPAK për ju?
“A e dini ju pse ju jeni brenda dhe ai që ju ka marrë copën e madhe, është jashtë? Se në fakt juve atje nuk ju çon drejtësia, se këtu drejtësi nuk ka, por juve në burg ju ka çuar vetë shefi juaj, Erion Veliaj ju ka çuar atje, sepse Erion Veliaj kërkon të shpëtojë kokën e vet, kërkon të shpëtojë kokën duke arrestuar disa ’ushtarë’ mediokër”, shtoi ai.
Këshilltari i PL-së Tedi Blushi e cilësoi bashkinë e Tiranës “monumentin më të fëlliqur të krimit të organizuar”.
“Është koha e aksionit, ndaj ju ftoj duke ju prirë ne të parët ju për ta arrestuar ne Erion Velinë kudo ku ai ndodhet. Për t’i dhënë atij ndëshkimin e merituar sa kohë SPAK-u është bërë pale me të, sa kohë SPAK-u është bërë palë në krim me Erion Velinë. Ai u amnistua nga krimi më i madh që ka bërë në krye të kësaj bashkie që është inceneratori fantazmë i Tiranës që edhe sot po paguhen 80 mijë euro për një shërbim që nuk kryhet”, shtoi më tej Blushi.
Belind Këlliçi, ish-kandidati i opozitës në Tiranë, në zgjedhjet e fundit lokale, tha se “misioni i Dumanit është të shpëtojë Erion Veliajn dhe Edi Ramën nga ligji dhe burgu”.
“Erion Veliaj mos u lodh të çosh ushtarët e tu as në SPAK, as afër funksionarëve të opozitës, se koha kur opozita blihej e shitej ka marrë fund. Ti do marrësh faturën që të takon si një hajdut i damkosur në këtë qytet,” theksoi Këlliçi.
Protesta e sotme zgjati rreth 1 orë, ndërsa e radhës u paralajmërua të enjten e ardhshme.
Nga ana tjetër, Erion Veliaj ka sulmuar tubimet e opozitës gjatë daljeve publike. Disa javë më parë, Veliaj u thirr në SPAK dhe u konfirmua nisja e një hetimi pasuror ndaj tij. Megjithatë, pavarësisht provave dhe indiceve si për dosjen e inceenratorit të Tiranës ashtu dhe atë “5D”, ndaj Veliajt nuk është ngritur asnjë akuzë penale.
Discussion about this post