Agron Haxhimali, Drejtor i Institutit për Bashkitë, reagoi pas ndërhyrjes së kryeministrit Rama në Bashkinë e Vlorës, ku u shkarkuan drejtues lokalë pas zgjedhjeve, ku theksoi se ndërhyrja e tij në pushtetin vendor përbën një zhvillim shqetësues për demokracinë lokale dhe autonominë e bashkive në Shqipëri.
Ai ngriti shqetësimin se kjo ndërhyrje jo vetëm që bie ndesh me parimet kushtetuese dhe normat e integrimit evropian, por vendos në pikëpyetje ndarjen dhe balancimin e pushteteve në vend.
Haxhimali vuri në dukje se rasti i fundit në Vlorë nuk është një rast i izoluar, por pjesë e një modeli të përsëritur ku pushteti qendror kap institucionet vendore, duke i trajtuar ato si zgjatim politik, dhe jo si një pushtet i pavarur që i përgjigjet qytetarëve.
Bashkitë nuk janë as pjesë e pushtetit qendror, as të ndonjë pushteti tjetër politik ato janë një pushtet më vete, i pavarur. Bashkitë nuk janë zgjatim i Partisë Socialiste. Ndërhyrja e kryeministrit është një shkelje e Kushtetutës dhe e ligjit; ajo cenon Kartën Evropiane për Autonominë Vendore. Këto dokumente përcaktojnë qartë ndarjen e pushteteve dhe rolet përkatëse, duke garantuar funksionimin e tyre edhe kur ka probleme.
Është e vërtetë që ka probleme: me furnizimin me ujë, me pastërtinë në plazhe, me menaxhimin e mbetjeve apo hapësirave publike. Është gjithashtu e vërtetë që bashkia nuk po performon mirë dhe kryetarët nuk po e kryejnë siç duhet detyrën. Por kryeministri e shfrytëzoi këtë moment kulmin e sezonit turistik për t’i shkarkuar ata menjëherë pas zgjedhjeve. Pyetja është: nëse qytetarët i votuan dhe i zgjodhën, si është e mundur që sot kryeministri del dhe konstaton se gjërat nuk po shkojnë mirë?
Ka një histori interesante mes Ramës dhe disa kryetarëve të bashkisë në Vlorë: Gjika, Lela, dhe tani Rredha. Nëse e analizojmë këtë histori, do të shohim se problemet janë të njëjta. Kemi të bëjmë me një spektakël politik. Madje, duket sikur ky veprim i fundit përcjell një mesazh për të gjithë kryetarët, drejtorët, dhe ndoshta është edhe një paralajmërim për zgjedhjet e ardhshme lokale.
Unë jam i shqetësuar vetëm për një gjë, që tani e mendoj seriozisht: A është ky reagim i Ramës një çështje e personalitetit të tij, e mënyrës së ushtrimit të pushtetit, apo është një reagim që vjen në emër të komunitetit në këtë rast, të qytetit të Vlorës?
Sepse në çdo rast, edhe pse ka pasur konflikte të këtij lloji, Rama është votuar sërish. Qytetarët duket se nuk e kanë kuptuar që diçka nuk shkon. Vlora është djegur, është përmbytur, disa herë para zgjedhjeve, dhe megjithatë të gjithë dukeshin të lumtur. Pse sot, disa grupe brenda bashkisë, me deputetë apo me aktorë të tjerë, kanë ngritur këtë ‘tymnajë’ kaq të madhe?”, u shpreh ai.
Discussion about this post