Presidenti i Republikës Ilir Meta e ka nisur konferencën e parë të këtij viti duke komentuar vendimin e Gjykatës Kushtetuese për të rrëzuar kërkesën për zgjedhjet e 30 qershorit.
Nga Presidenca, Meta u shpreh se me vendimin e saj Gjykata nuk mori asnjë përgjegjësi duke e lënë pa zgjidhje përfundimtare atë çështje.
“Prandaj lidhur me zgjedhjet për pushtetin vendor të 30 qershorit 2019 kur prisnim që Gjykata Kushtetuese përmes një vendimmarrje të themeltë t’i rikthente qytetarëve mundësinë për shprehjen e vullnetit për të zgjedhur përfaqësuesit e tij realë në pushtetin vendor, përkundër kësaj pritshmërie të lartë dhe legjitime të popullit tonë, por edhe të shumë institucioneve ndërkombëtare do duhet të kishte një vendim përfundimtar të Gjykatës Kushtetuese për zgjedhjet e 30 qershorit, ndërsa kjo gjykatë nuk mori asnjë përgjegjësi. Gjykata Kushtetuese me vendimin e 4 dhjetorit vendosi të rrëzojë kërkesën e shoqatës së bashkive, pasi sipas saj nuk bën pjesë në juridiksionin kushtetues duke shpallur veten jokompetente për shqyrtimin e këtij rasti. E la pa një zgjidhje përfundimtare këtë çështje. Me vendimmarrjen e saj Gjykata Kushtetuese nuk pati vullnet ta zgjidhte këtë çështje përmes juridiksionit gjyqësor kushtetues, por ia la këtë çështje përsëri juridiksionit politik”, deklaroi Meta.
Konferenca e Metës zhvillohet një ditë pas kthimit nga vizita zyrtare në Maqedoni, ndërkohë që zhvillimet politike në vend e sidomos në selinë blu po arrijnë kulmin.
Discussion about this post