Shoqata e Bashkive dhe e të Zgjedhurve Vendorë i është drejtuar me një letër urgjente Kongresit të Autoriteteve Lokale dhe Rajonale të Këshillit të Evropës, duke kërkuar monitorimin e procesit të rishikimit të Reformës Administrativo-Territoriale në Shqipëri.
Në letrën e firmosur nga kryetari Fisnik Qosja dhe drejtori ekzekutiv Arlind Hoxha, Shoqata ngre shqetësime për mënyrën se si është zhvilluar procesi, duke pretenduar se komisioni parlamentar e ka mbyllur punën pa përfunduar të gjitha fazat e përcaktuara në kalendarin zyrtar.
Sipas tyre, nga 16 aktivitetet e parashikuara janë zhvilluar vetëm analizat paraprake dhe raundi i parë i konsultimeve në qarqe. Ndërkohë, disa prej fazave kryesore, përfshirë raundet e tjera të konsultimeve, sondazhin publik, takimet me institucionet ndërkombëtare dhe publikimin e dokumentit politik me alternativat e reformës, nuk janë realizuar.
Shoqata sqaron se nuk kundërshton në parim ndryshimin e numrit të bashkive apo hartës territoriale, por kërkon që vendimmarrja të mbështetet në një proces transparent, gjithëpërfshirës dhe në përputhje me standardet evropiane për autonominë vendore.
Në letrën drejtuar Këshillit të Evropës përmendet edhe mungesa e dëgjesës së parashikuar për Bashkinë e Tiranës, ndërsa vëmendje i kushtohet edhe kundërshtimeve të shfaqura në disa bashki që preken nga propozimet për riorganizimin territorial.
Shoqata kërkon që institucionet evropiane të vlerësojnë nëse procesi ka respektuar standardet e konsultimit dhe pjesëmarrjes së autoriteteve vendore dhe komuniteteve përpara se të merret vendimi përfundimtar.
Discussion about this post