Numri i viktimave nga tërmeti i tmerrshëm që goditi pjesën jugore të Turqisë përgjatë kufirit me Sirinë mëngjesin e së hënës po rritet orë pas ore. Një numër i madh njerëzish janë ende të varrosur nën rrënoja dhe me kalimin e kohës shanset që dikush të gjendet i gjallë po zvogëlohen.
Basketbollistja e kombëtares turke, Nilay Aydogan, është në mesin e personave që janë në kërkim të vazhdueshëm, transmeton “Hurriet” turke.
Universiteti Çankaya, për të cilin luan basketbollistja turke, bëri të ditur se vajza fatkeqe shkoi për të vizituar familjen e saj në Malatya dhe aty u kap nga një tërmet katastrofik. Shtëpia ku qëndronte Aydogan u shemb dhe basketbollistja u zhduk nën rrënoja.
” Ajo shkoi në provincën Malatya për të vizituar gjyshen e saj. Sipas informacioneve që morëm, shtëpia ku po qëndronte Nilay u shkatërrua dhe procesi i shpëtimit vazhdon. Po mundohemi të marrim informacione të reja nga familja dhe të afërmit. Të gjithë jemi duke u lutur për Nilay tonë ”, shkruan klubi në rrjetet sociale.
Të gjithë shpresojnë për një fund të lumtur të kërkimit dhe nuk e humbin shpresën. Ata theksojnë se për të shpëtuar basketbollisten janë të nevojshëm betoniere dhe pajisje të ndryshme ndërtimi.
Sipas informacioneve të fundit, më shumë se 15 mijë persona kanë humbur jetën nga tërmeti që goditi Turqinë dhe Sirinë.
Discussion about this post