Nëse flasim për historinë e fundit të Lazios, është e pamundur të mos kujtohet Miroslav Klose. Kampioni i botës me Gjermaninë luajti disa nga sezonet e tij më të mira me bardhekaltrit në Romë, duke fituar gjithashtu Kupën historike të Italisë më 2013. Ai mbërriti në verën e vitit 2011 nga Bayern Munich.
Tani, skuadra e Sarrit do të luajë për t’u kualifikuar në çerekfinalet e Champions League ndaj bavarezëve.
Kthimi nis nga rezultati 1-0 i ndeshjes së parë. Klose, në prag të ndeshjes së kthimit, përsëriti dashurinë e tij për Lazion.
“Bayern Munich apo Lazio? Unë do të mbështes bardhekaltrit. Kryesisht sepse kalova një vit më shumë te Lazio sesa te Bayerni. Tani shkoj shpesh në Romë, kam shumë miq atje. Në ato pesë vite te Lazio unë dhe familja ime jemi bërë shumë të dashur për qytetin dhe klubin, për gjithçka që kemi përjetuar së bashku. Për më tepër, atje janë gjithnjë e më shumë në favor të të huajve. Sidoqoftë, Bayerni ishte dhe vazhdon të jetë favorit i qartë”.
Më tej Klose vazhdoi të fliste për lidhjen e tij me bardhekaltrit dhe Italinë.
“Lazio ishte moment kurorëzimi i karrierës sime. Kjo vlen për të gjithë ‘paketën’; me qytetin, me Lazion, me ekipin. Në vitin 2011 kam pasur edhe oferta të tjera nga Anglia dhe Turqia, por si familje zgjodhëm qartësisht Romën dhe ishte gjëja më e mirë që mund të na kishte ndodhur. Jo vetëm sepse fëmijët tanë filluan shkollën atje dhe mësuan italisht, por mësova gjithashtu se në Itali njerëzit e përjetojnë futbollin ndryshe”.
Discussion about this post