Sulmuesi i Bayern Mynih, Sadio Mane, ka dhënë këshillën e tij për drejtuesit e skuadrës gjermane, duke thënë se duhet të nënshkruajnë përfundimisht me mbrojtësin portugez, Joao Cancelon, pasi i huazuari nga Manchester City po impresionon me paraqitjet e tij.
Cancelo nuk është se ka qenë startues i padiskutueshëm te Bayerni në këto pak lojë që kur erdhi në huazim në janar, por bëri përshtypje në fitoren 5:3 të së shtunës ndaj Augsburgut. Reprezentuesi portugez shënoi në kthimin e tij në skuadër, duke bërë që Mane t’i kërkojë Bayernit që ta mbajë atë në klub pasi të përfundojë sezoni.
“Çfarë lojtari! Sot pamë sërish se Joao është një nga më të mirët në botë. Shumë mirë, me të vërtetë, jemi shumë të lumtur që ai po luan për ne,” tha ai për Sport1. “Do të doja ta shihja atë me ne sezonin e ardhshëm. Na duhen pikërisht ata lloj lojtarësh, me siguri!”
Marrëveshja e huazimit për Cancelon përfshin një opsion blerjeje prej 70 milionë eurosh, por nuk është e qartë nëse Bayern do të përdorë këtë mundësi për të blerë mbrojtësin. 28-vjeçari e filloi jetën në Allianz Arena me shkëlqim, por më pas u ul në stol për ndeshjen e radhës në UEFA Champions League kundër PSG. Drejtori sportiv, Hasan Salihamidziç tha se Cancelo ishte lënë jashtë sepse ai nuk ishte stërvitur mjaft mirë për të luajtur.
Skuadra e Julian Nagelsmann ndeshjen e radhës e zhvillon në Bundesliga përballë Bayer Leverkusenit të Xabi Alonsos, javën tjetër.
Discussion about this post