Qeveria e Kosovës i ka ofruar SHBA-ve mundësinë që të krijojnë një bazë të përhershme ushtarake në Kosovë.
Armend Mehaj, Ministër i Mbrojtjes në Kosovë tha se këtë ofertë ia ka paraqitur Nënsekretarit të Departamentit amerikan të Mbrojtjes, Colin Kahl gjatë një vizite në Uashington. Sipas tij, SHBA janë duke e shqyrtuar ofertën që pastaj të koordinohen lidhur më këtë çështje.
Sipas Rrustem Berishë, ish-ministri i Forcës së Sigurisë së Kosovës, një bazë e përhershme ushtarake do të shuante pretendimet territoriale, doke pohuar se do të vendoste dhe një marrëveshje mes Kosovës dhe Serbisë.
“Mundësinë për krijimin e një bazë të përhershme ushtarake amerikane në Kosovë e shoh si një hap të qëlluar dhe e vlerësoj lartë, pasi që kjo ndikon në rritjen e stabilitetit të brendshëm në Kosovë dhe në rajon në përgjithësi. Kjo gjithashtu do të ndikon në avancimin e raporteve të Kosovës me SHBA-të”, u shpreh Berisha.
Prej vitit 1999, në Kosovë ekziston kampi ushtarak amerikan, “Bondsteel”, i cili është kampi i vetëm amerikan në Evropën Juglindore. Sipas “Reuters”, në këtë kamp qëndrojnë 700 ushtarë amerikan.
Sipas Berishës, dallimi mes këtij kampi dhe bazës së përhershme është sepse baza ka një mesazh të qartë për ata që duan të marrin territoret që nuk ju takojnë.
Një bazë e përhershme ushtarake e SHBA-ve në Kosovë do të shuante aspiratat e atyre që kanë pretendime territoriale ndaj Kosovës si dhe do të hapte rrugë për marrëveshje gjithëpërfshirëse mes Kosovës dhe Serbisë”, ka pohuar ish-ministri.
Përmes kësaj baze ushtarake amerikane do të avancohet bashkëpunimi ushtarak në fushën e sigurisë mes dy vendeve si dhe do të ndihmohet zhvillimi i Forcës së Sigurisë së Kosovës.
Vendosja e një baze ushtarake amerikane në Evropën Juglindore ishte kërkuar që në 2017 nga Këshilli Atlantik me seli në Uashington, përmes një raporti mbi Strategjinë e re amerikane në Ballkan. Sipas raportit, ajo do të ndihmonte stabilizimin e rajonit.
