Bashkimi Evropian po planifikon të bashkërendojë shpërndarjen e furnizimeve për Ukrainën nëpërmjet një qendre të re logjistike në Rumani. Kështu njoftuan presidentja e Komisionit Evropian, Urusla von der Leyen dhe presidenti rumun, Klaus Iohannis në Bukuresht ditën e sotme.
“Ju jeni një shembull i shkëlqyer i solidaritetit evropian,” tha von der Leyen, duke vlerësuar gatishmërinë e Rumanisë për të ndihmuar refugjatët nga Ukraina. Qendra logjistike do të jetë magazinë për furnizime, duke përfshirë donacione private, nga ku mund të organizohet dërgesa në Ukrainë nën mbikëqyrjen e BE-së.
Qendra duhet të funksionalizohet brenda pak javësh, bëri me dije Iohannis. Sipas Komisionit Evropian, qendra të tjera logjistike janë planifikuar në Poloni dhe Sllovaki. Në fillim të luftës në Ukrainë qytetarët rumunë u mblodhën në kufi në një numër të madh për të mirëpritur refugjatët me ushqim, ujë, batanije dhe qumësht për foshnja.
Discussion about this post