Pasi presidenti i Këshillit Evropian fajësoi pushtimin rus të Ukrainës për shkaktimin e një krize globale ushqimore, ambasadori i Rusisë në OKB ka vendosur që të largohet nga takimi i Këshillit të Sigurimit të OKB-së.
Charles Michel tha se Rusia po përdorte furnizimet ushqimore si një “raketë” kundër botës në zhvillim, duke i detyruar njerëzit të rrinë në varfëri.
“Zoti Ambasador i Federatës Ruse, le të jemi të sinqertë, Kremlini po përdor furnizimet ushqimore si një raketë vjedhurazi kundër vendeve në zhvillim”, tha zoti Michel gjatë takimit të Këshillit të Sigurimit në Nju Jork.
Sipas Michel, pasojat dramatike të luftës së Rusisë po përhapen në të gjithë globin dhe kjo po rrit çmimet e ushqimeve, duke i shtyrë njerëzit në varfëri dhe duke destabilizuar rajone të tëra. Nga ana tjetër, i dërguari rus Vassily Nebenzia akuzoi zotin Michel për përhapjen e gënjeshtrave. Lufta me Rusinë ka bërë që ushqimet të bllokohen në portet e Ukrainës.
Ukraina është një eksportues i madh i vajit të gatimit, si dhe i drithërave si misri dhe gruri. Rusia gjithashtu eksporton sasi të mëdha drithërash, si dhe plehra. Mungesa e këtyre eksporteve ka bërë që çmimi i alternativave të rritet.
Discussion about this post