Komisioni Europian do të propozojë sot krijimin e një mekanizmi financimi për të rritur aftësinë për të prodhuar municione në vendet anëtare të Unionit.
Synimi është që të jetë në gjendje të prodhojë një milion predha në vit, për të rimbushur stoqet e forcave të armatosura të vendeve europiane dhe në të njëjtën kohë për të ofruar mbështetje materiale për Ukrainën.
“Unë jam i sigurt se në 1 vit, ne do të jemi në gjendje të rrisim kapacitetin tonë të prodhimit në një milion predha në vit në Europë,” tha të martën komisioneri i industrisë Thierry Breton.
Propozimi është faza e tretë e një plani veprimi të miratuar nga BE në fund të marsit për të ofruar të paktën një milion predha 155 mm në Ukrainë brenda 12 muajve dhe për të rimbushur rezervat strategjike të shteteve të Europës, disa prej të cilave janë në kufijtë e tyre.
Kjo parashikon financim prej 500 milionë eurosh, 260 milionë prej të cilave do të merren nga Fondi Europian i Mbrojtjes. Do të mundësojë bashkëfinancimin e investimeve nga industritë për të rritur prodhimin në fabrikat e BE-së.
Rreth 15 kompani në 11 Shtete Anëtare prodhojnë municione të këtij lloji.
Pas një apeli të presidentit ukrainas Volodymyr Zelensky më 9 shkurt, shtetet anëtare të BE-së furnizuan Ukrainën me afro 40,000 predha dhe më shumë se një mijë raketa për armë anti-ajrore dhe antitank.
Discussion about this post