Ministria e Bujqësisë ka reaguar ndaj vendimit të Komisionit Europian për ndërprerjen e fondeve në fushën e bujqësisë për Shqipërinë, pas një hetimi që ngriti dyshimet për shpërdorim dhe korrupsion.
Në një deklaratë zyrtare thuhet se në këtë fazë, Komisioni Europian ka marrë masa paraprake bazuar në informacionin paraprak të dhënë nga OLAF.
“Si masë parandaluese për mbrojtjen e interesave financiare të Bashkimit Europian, Komisioni Europian ka ndërprerë përkohësisht rimbursimet ndaj autoriteteve shqiptare për shpenzimet e kryera në kuadër të programit IPARD II”, thuhet në deklaratë e Komisionit Europian.
Ndërkohë në reagimin zyrtar, Ministria e Bujqësisë bën lojra fjalësh, ndërsa e konsideron si normale procedurën e ndjekur nga BE, që ka të bëjë me pezullimin e faturës.
Por sipas Ministrisë së Bujqësisë, programi i mbështetjes nuk është ndërprerë, ndërsa puna vazhdon. Në një reagim zyrtar, Ministria e Bujqësisë e drejtuar nga Frida Krifca thotë se bëhet fjalë për një procedurë normale të BE-së që ka të bëjë me një pezullim të faturës aktuale të rimbursimit nga DG AGRI për një pjesë të shpenzimeve te radhës.
“Ky është një proces krejtësisht administrativ që lejon riverifikimin e sistemeve të kontrollit nga strukturat e akredituara të cilat do të marrin masat e nevojshme me qëllim vijimin normal të rimbursimit nga BE”, deklaron Ministria e Bujqësisë.
Në vijim, Krifca thotë se autoritetet shqiptare janë vënë në dijeni të një pezullimi të faturës aktuale të rimbursimit nga DG AGRI për një pjesë të shpenzimeve te radhës.
“Të gjithë strukturat shqiptare janë në bashkëpunim dhe në koordinim të vazhdueshëm me zyrën e OLAF dhe DG AGRI duke ofruar transparencë të plotë, sikurse kanë vepruar nga dita e parë e akreditimit, të të gjithë proceseve kontrolluese, hetuese dhe administrative të ndjekura deri më sot apo që mund të aktivizohen në të ardhmen.
Procesi i akreditimit të programit IPARD ka nisur prej më shumë se 10 vjetësh dhe zbatimi ka mundur te nis vetëm në fund të vitit 2018 pas akreditimit te strukturave operuese në perputhje me Marrëveshjen Kuadër, Sektoriale dhe Financiare te ratifikuar në Parlamentin shqiptar. Prej vitit 2018 programi ka sjelle një transformim rrënjësor të proceseve prodhuese e përpunuese në vendin tonë si dhe në rritjen e ekspertizës teknike të stafit vendas.
Si çdo mekanizem financiar, programi shqyrton, kontrollon dhe zbaton projekte në perputhje me rregulla të mirëpërcaktuara e të miratuara nga Bashkimi Europian të cilat kontrollohen dhe auditohen vazhdimisht nga struktura të brendshme e të jashtme. Nëse vërehen shkelje, programi përcakton strukturat operuese që marrin masa dhe veprohet në përputhje me procedurat ligjore të parashikuara ashtu sikurse veprohet në cdo strukturë të ngjashme në vendet e Bashkimit Europian”, thuhet në reagimin e Krifcës.
Në përfundim, Ministria e Bujqësisë, ashtu sicc pritej, thotë se ndjehet krenare për punën e bërë, programi vazhdon dhe të gjithë strukturat e akredituara ne zbatim te tij janë në partneritet të plotë me partnerët europianë për të mundësuar mbarëvajtje të suksesshme në të mirë të vendit.
Discussion about this post