Komisionarja për Zgjerim e Bashkimit Evropian (BE), Marta Kos, tha sot se blloku mbetet i shqetësuar për gjendjen e sundimit të ligjit në vendet kandidate në Ballkan, Shqipëri, Serbi, Mal të Zi dhe Maqedoni të Veriut, edhe pse ka pasur përparim të dukshëm në këtë fushë.
“(Ka) ndërhyrje në procedurat gjyqësore, presion të tepruar mbi zyrtarët që hetojnë korrupsionin, si dhe politizim të rregullatorëve të medias. E gjithë kjo është e papranueshme”, tha Kos në konferencën për shtyp pas takimit.
Ajo shtoi se nuk mund të ketë kompromis mbi vlerat themelore dhe se ato do të jenë në qendër të raporteve të zgjerimit të këtij viti.
Marie Bjerre, ministrja daneze e Çështjeve të BE-së që përfaqëson presidencën e Këshillit, kujtoi se kjo ishte hera e dytë që Këshilli i Çështjeve të Përgjithshme kishte zhvilluar këtë diskutim me vendet kandidate.
“Kjo tregon integrimin e mëtejshëm të vendeve kandidate me BE-në dhe gjithashtu se kjo është diçka që ne e marrim shumë seriozisht”, tha Bjerre.
Ajo i bëri këto komente pas një mbledhjeje të Këshillit të Çështjeve të Përgjithshme të BE-së, ku ministrat nga disa shtete anëtare dhe vende kandidate biseduan për sundimin e ligjit në BE.
Danimarka mban tani presidencën e Këshillit dhe ministrja e saj për Çështjet Evropiane, Marie Bjerre, theksoi se sundimi i ligjit në BE është tani vlera e saj më e rëndësishme.
Bjere tha se gjatë diskutimit, ministrat diskutuan gjendjen e sundimit të ligjit në vendet e Ballkanit Perëndimor, duke iu referuar raportit të publikuar mbi këtë temë nga Komisioni Evropian (KE) në korrik të këtij viti.
Në diskutimin e Këshillit të BE-së morën pjesë edhe ministrat për integrimin evropian të Serbisë, Shqipërisë, Malit të Zi dhe Maqedonisë së Veriut, të cilët nuk komentuan mbi rezultatin e bisedimeve, raportoi agjencia e lajmeve Beta.
Kos shtoi se anëtarët e BE-së mbështeten në sundimin e ligjit, i cili përfshin një gjyqësor të pavarur, zgjedhje dhe media, dhe se vendet që synojnë anëtarësimin, por nuk mund të garantojnë një nivel të caktuar të sundimit të ligjit, nuk mund të anëtarësohen.
Ajo deklaroi gjithashtu se vendet e Ballkanit Perëndimor janë tani “në qendër të procesit të zgjerimit” dhe se sundimi i ligjit u garanton atyre liri dhe forcë në atë proces.
“Është e qartë se nëse kandidatët nuk respektojnë zbatimin e sundimit të ligjit në vendet e tyre, ata nuk do të jenë në gjendje të jenë anëtarë të Unionit”, tha Kos.
Kos nuk e përmendi Kosovën kur foli për vendet e Ballkanit Perëndimor.
Kosova bëri kërkesë për anëtarësim në Bashkimin Evropian në dhjetor të vitit 2022, por kërkesa e saj nuk është shqyrtuar ende, dhe si rrjedhojë ajo është vendi i vetëm në Ballkan që ende nuk e ka statusin e vendit kandidat.
Derisa vende të tjera të Ballkanit kanë ngecur në rrugën drejt integrimit në BE, Shqipëria këtë javë i hapi edhe disa kapituj, duke e çuar në 28 nga 33 gjithsej numrin e kapitujve të hapur./REL
Discussion about this post