Ndonëse ka pasur mjaft kontestime në fillimet e saj, nisma e ndërmarrë nga Shqipëria, Serbia dhe Maqedonia, e quajtur “Open Balkan”, duket se po merr çdo ditë e më shumë mbështetje nga Brukseli zyrtar.
Pas Komisionerit për Zgjerimin, Olivér Várhelyi, është zëdhënësja e Komisionit Evropian, Ana Pisonero e cila theksoi se përfitimet më të mëdha rajonale do të vijnë nga pjesëmarrja, siç tha ajo, e “të gjashtë vendeve të Ballkanit Perëndimor” në atë iniciativë.
Ajo u shpreh se integrimet rajonale, të cilat bazohen në rregullat e Bashkimit Evropian, sjellin vetëm përfitime për Ballkanin Perëndimor, prandaj BE-ja është shumë e prirur për bashkëpunim rajonal.
Pisonero deklaroi gjithashtu se liderët e Ballkanit Perëndimor duhet të bëjnë përparim në zbatimin e Tregut të Përbashkët Rajonal, të krijuar në Samitin e Sofjes në vitin 2020, me angazhimin konstruktiv të të gjitha palëve.
Ajo theksoi se BE-ja do të vazhdojë të mbështesë Këshillin e Bashkëpunimit Rajonal, marrëveshjen CEFTA, Komunitetin e Transportit dhe Energjisë, në mënyrë që të përfitojë i gjithë Ballkani Perëndimor dhe më gjerë, përmes përmirësimit të bashkëpunimit rajonal.
Discussion about this post