Gjermania ka nisur një proces të diskutimit të sanksioneve për fajtorët kryesorë për krizën politike dhe të sigurisë në Bosnje dhe Hercegovinë në selinë e Bashkimit Evropian në Bruksel.
Në mbledhjen e ardhshme të ministrave të jashtëm të BE-së, që pritet të mbahet me 15 nëntor, do të diskutohet vendosja e sanksioneve dhe shpallja “non grata” e disa politikanëve, ku përfshihen dhe udhëheqës politikë të Bosnje Hercegovinës.
Ky diskutim i referohet në radhë të parë Milorad Dodik, por edhe të gjithë atyre individëve dhe kompanive që mbështesin financiarisht politikat destruktive. Në prag të largimit nga BeH, edhe i dërguari amerikan për Ballkanin Perëndimor, Gabriel Escobar tha dje se sanksionet janë në tryezë dhe se ato vlejnë për individët, por edhe për kompanitë.
Duke pasur parasysh retorikën dhe lëvizjet politike të Milorad Dodik, i cili, megjithë paralajmërimet amerikane dhe evropiane, vazhdon të tërhiqet në mënyrë të njëanshme nga institucionet e BiH, sanksionet janë gjithnjë e më të mundshme.
Një takim në nivel të ambasadorëve të BE-së është mbajtur dje në Bruksel. Për momentin nuk dihet nëse Gjermania ka propozuar sanksione specifike apo sapo ka nisur bisedimet për sanksione si opsion.Duke qenë se është e vështirë të pritet një konsensus i të gjithë anëtarëve të Bashkimit Evropian, prej kohësh ka qenë opsioni më i mundshëm për shtetet që të vendosin sanksione individualisht.
Megjithatë, ka gjithnjë e më shumë gjasa që edhe vendet e tjera të Bashkimit Evropian mund të marrin këtë rrugë. Dhe pikërisht për këtë do të diskutohet këto ditë në Bruksel. Gjermania është ajo që ka nisur sot procesin dhe se çfarë konkluzionesh do të vijojnë duhet të jenë më të qarta në mesin e muajit, kur ministrat e jashtëm të BE-së do të diskutojnë situatën në Ballkanin Perëndimor dhe rrjedhimisht në BeH. Ajo që është e qartë është se çdo hap do të negociohet në detaje me Shtetet e Bashkuara.
Discussion about this post