Ambasadorja e Bashkimit Europian në Tiranë, Christiane Hohmann ka folur sot për administratën publike, e cila sipas saj, ka një rëndësi të madhe për plotësimin e kushteve që Shqipëria të futet në BE.
Gjatë fjalës së saj në prezantimin e projektit “Ngritja e kapaciteteve për nëpunësit civilë” ku do të marrin pjesë 25 punonjës, Hohmann tha se në administratë gjithçka duhet të jetë në bazë të meritës, ndërsa shtoi faktin se të gjithë duhet të përveshin mëngët dhe të plotësojnë kushtet e dhëna nga BE.
“Kemi disa programe për të mbështetur administratën publike, për të krijuar pavarësi që gjithçka të jetë në bazë të aftësisë suaj. Jemi në hapat e parë të negociatave. Administrata publike është pjesë e grup-kapitujve, që kanë të bëjnë me ekonominë dhe funksionim e demokracisë së një vendi. Udhërrëfyesi për administratën publike është një nga pikat e negociatave. Varen kaq shumë gjëra nga administrata publike. Shqipëria duhet të bëhet anëtare e BE dhe për këtë duhet të punojmë fort dhe të përveshim mëngët”.- u shpreh Christiane Hohmann.
Discussion about this post