Pep Guardiola ka konfirmuar se Mançester Siti do të jetë puna e fundit e tij në një klub si trajner. Guardiola ka shijuar tetë vite e gjysmë të shkëlqyera në “Etihad”, duke e udhëhequr Sitin drejt gjashtë titujve të Premier Ligës dhe shumë trofeve të tjerë.
Katalanasi është aktualisht në mes të periudhës së tij më të vështirë të karrierës, me Sitin që ka fituar vetëm një nga tetë ndeshjet e fundit në të gjitha kompeticionet. Sidoqoftë, ai nënshkroi një marrëveshje të re deri në vitin 2027 muajin e kaluar, e cila do ta dërgojë në një dekadë qëndrimin e tij me kampionët e Premier Ligës. Dhe, duke folur në një intervistë me shefin spanjoll të kuzhinës, Dani Garsia, Guardiola bëri një zbulim të madh për të ardhmen e tij dhe tha se nuk do të drejtojë asnjë ekip tjetër në të ardhmen pasi të largohet nga Siti. “Unë nuk do të drejtoj një ekip tjetër,” tha ai.
“Nuk po flas për të ardhmen afatgjatë, por ajo që nuk do të bëj është të largohem nga Siti, të shkoj në një vend tjetër dhe të bëj të njëjtën gjë si tani. Nuk do të kisha energji… Mendimi për të filluar diku tjetër, i gjithë procesi i stërvitjes e kështu me radhë… Jo, jo, jo! Ndoshta një ekip kombëtar, por kjo është ndryshe. Unë duhet të ndaloj, si këta kuzhinierë që shkojnë në vende të tjera. Të ndalem dhe të shoh se çfarë kemi bërë mirë dhe çfarë mund të bëjmë më mirë dhe kur je i zënë gjithë ditën, ditë pas dite, nuk ke kohë për ta bërë këtë. Dua ta lë këtë dhe të shkoj të luaj golf, por nuk mundem. Mendoj se ndalimi do të më bënte mirë”.
53-vjeçari tregoi gjithashtu se çfarë ka ndërmend të bëjë pasi të lërë këtë profesion.
“Unë jam ende i ri dhe kur të ndalem, ka disa gjëra që dua të bëj. Një prej tyre është të mësoj frëngjisht, t’i kushtoj kohën time të lirë vetes në mënyrë që të luaj golf dhe më pas të filloj të mësoj se si të gatuaj gjëra të thjeshta. Një nga terapitë më të mira që kam është kur janë turnetë kryesore të golfit dhe nga e enjtja në të diel unë përgatis ndeshjet e mia në shtëpi ose këtu në ‘Tast’ (restoranti spanjoll që zotëron Pep në Mançester). Unë shoh rivalin tonë dhe pamjet, por gjithmonë me golfin në sfond”.
Juventusi
Sfida e radhës është Juventusi sot në Torino, për të cilët ai flet me superlativa:
“Ne luajmë në Torino kundër skuadrës më të rëndësishme në Itali, bashkë me Milanin dhe Interin. Por sa i përket Serisë A, është skuadra që ka fituar më shumë. Është një stadium i bukur, por ne do të përpiqemi që të marrim një rezultat të mirë. Doktorët dhe fizioterapistët kanë një punë të pabesueshme këtë sezon, ashtu siç nuk kam parë kurrë më parë, por e vërteta është se ne kemi pak lojtarë për të bërë rrotacion në këtë periudhë”.
Discussion about this post