Presidenti Bajram Begaj përcolli një mesazh urimi me rastin e “Ditës së Verës”. Begaj ndau me shqiptarët elementet tradicionale të kësaj feste, e cila kremtohet në të gjithë vendin për të lajmëruar ardhjen e pranverës.
Kreu i Shtetit risolli në vëmendje mënyrën se si kjo festë pritej në vendlindjen e Tij në të gdhirë të datës së 14 Marsit, kur fëmijët lajmëronin ardhjen e stinës së pranverës.
“Në fëmijërinë time, 14 Marsi niste me të vegjlit që shpërndanin në çdo shtëpi një plis me grurë të sapombirë, degë ulliri dhe degë lule kumbulle.
Kjo bëhej për të uruar një pranverë të begatë, të paqtë dhe të gëzuar. Mbarësi, begati dhe gëzim sjelltë kjo festë në çdo shtëpi shqiptare”, shkruan Presidenti i Republikës në profilin e tij zyrtar në facebook, ku shpërndau edhe një video me simbolin e “Ditës e Verës” së fëmijërisë së tij.
Edhe kryeministri Edi Rama ka uruar Ditën e Verës. Kreu i qeverisë ka ndarë një fotografi nga organizimet në qytetin e Elbasanit, ndërsa ka shkruar se iu uron të gjithëve një pranverë të bukur.
“Mirëmëngjes dhe me ditën që paralajmëron më shumë diell e mbarësi, ju uroj një pranverë të bukur”, ka shkruar kryeministri Rama në një postim në Facebook.
Elbasani është kryeqendra e festimeve për ditën e Verës, pasi e ka mbajtur “gjallë” këtë festë për shekuj. Festime janë planifikuar edhe në kryeqytet ndërsa do të ketë edhe devijime në qarkullim.
Discussion about this post