37 deputetë të Partisë Socialiste kanë hedhur firmën që Bajram Begaj të propozohet në Kuvend si presidenti i ri. Vetëm pak minuta më parë PS dorëzuar në kryesinë e Kuvendit zyrtarisht kandidaturën e Bajram Begajt si president të republikës së Shqipërisë. Për vlefshmërinë e kandidaturës, janë të nevojshme 20 firma deputetësh. Por një ditë më herët kryeministri Rama deklaroi se Begaj si kandidaturë e vetme e socialistëve do të merrte firmat e të gjithë anëtarëve të grupit parlamentar të PS. Mirëpo kjo gjë nuk ka ndodhur, pasi gjatë depozitimit të kandidaturës së Begajt vetëm 37 deputetë kanë qenë firmëtarët për propozimin e tij si kreu i ri i shtetit.
Mirëpo, ndërkohë që orët kalojnë duket se po krijohet një ngërç. Begaj që të nisë rrugëtimin e tij për në krye të shtetit, i duhet firma e presidentit aktual Ilir Meta që e liron atë nga detyra si shef i Shtabit të Përgjithshëm të Forcave të Armatosura. E gjitha kjo ndodh, ndërkohë që Meta ndodhet në një vizitë në Turqi. Aktualisht kryeministri Edi Rama dhe Taulant Balla janë në një mbledhje në Kryesinë e Kuvendit me Klotilda Bushkën për të gjetur një hapësirë ligjore për të shmangur ngërçin në fjalë. Kujtojmë se në orën 18:00 sot do të zhvillohet seanca e posaçme në Kuvend për të votuar kandidaturën e Bajram Begajt për president.
Discussion about this post