Seanca e sotme në Parlamentin shqiptar, e para për vitin 2024, pritet të shoqërohet me tensione, ndërsa Gazment bardhi, kreu i Grupit Parlamentar të PD-së, është përplasur me Gardën e Republikës, lidhur me kontrollet që ajo po ushtron ndaj deputetëve të opozitës.
Garda e Republikës ka shtuar masat e sigurisë, duke ushtruar kontrolle rigoroze ndaj ligjvënësve opozitarë, çka duket se nuk është “gëlltitur” nga kreu i grupit parlamentar demokrat.
Në Kuvend ka shkuar edhe Presidenti i Republikës, Bajram Begaj, i cili pritet t’u drejtohet me një mesazh deputetëve, por edhe disa nga ambasadorët dhe diplomatët e akredituar në Tiranë, që pritet të ndjekin seancën nga lozhat e Kuvendit.
Në seancë pritet të betohen edhe dy ministrat e rinj të Qeverisë, Blendi Gonxhe dhe Adea Pirdeni, ndërsa opozita ka paralajmëruar vijimin e aksionit opozitar.
Nuk dihet nëse deputetë të opozitës do të tentojnë edhe sot të protestojnë në sallën e Kuvendit, ashtu sikundër ka ndodhur në seancat e 2023-it, apo do të stepen nga prania e diplomatëve dhe Presidentit.
Discussion about this post