Kreu i Grupit Parlamentar të Partisë Demokratike, Gazment Bardhi, ka lëshuar një deklaratë të fortë ndaj Presidentit të Republikës, Bajram Begaj, duke e akuzuar atë për korrupsion dhe përfitim të paligjshëm.
Në një postim në rrjetet sociale, Bardhi shprehet se Presidenti vazhdon të “flasë, por të mos thotë asgjë”, duke iu referuar qëndrimit të kreut të shtetit ndaj akuzave të ngritura për përfshirjen e të birit në një konflikt të pastër interesi.
“Çfarë e pengoi ‘Doktorin e Mrekullive’, njëherazi Presidentin, të pohojë se djali i tij paguhet pa qenë fare në Shqipëri nga kompania me të cilën Presidenca ka kontratë për të gjitha prokurimet e institucionit?”, shkruan Bardhi.
Sipas tij, i biri i Presidentit jeton dhe punon si mjek në Gjermani, por pavarësisht kësaj, ka marrë pagesa në Shqipëri nga një kompani sigurimesh, e cila ka kontratë prokurimi me Presidencën. Bardhi pretendon se pagesa vjetore arrin në 30 mijë euro, dhe se ky fakt është i dokumentuar përmes deklaratave zyrtare të pasurisë dhe të dhënave nga Thesari i Shtetit.
“Sado të shmanget e të përdridhet Presidenti i çnderuar, përgjigjja është vetëm një: korrupsioni dhe përfitimi i paligjshëm i Presidentit”, thekson Bardhi, duke paralajmëruar se kjo është vetëm një pjesë e rastit të skandaleve që, sipas tij, justifikojnë kërkesën për shkarkimin e Presidentit Bajram Begaj.
Ai i bën thirrje Kuvendit të mos mbyllë sytë, duke nënvizuar se korrupsioni ka prekur majat e shtetit.
Deri më tani nuk ka një reagim zyrtar nga Presidenca mbi këto akuza të reja.
Discussion about this post