Pas disa javësh pa një qëndrim publik mbi protestat që po zhvillohen në Tiranë, Presidenti i Republikës, Bajram Begaj, ka komentuar për herë të parë situatën gjatë një aktiviteti zyrtar, pasi forcoi marrëdhëniet me Kirgistanin.
Në ceremoninë e organizuar me rastin e 100-vjetorit të krijimit të Prefekturës së Tiranës, kreu i shtetit u ndal te zhvillimet e fundit në vend, teksa protestat qytetare vijojnë prej javësh në kryeqytet.
Begaj theksoi se është neutral se respekton Kushtetutën.
“Ky aktivitet zhvillohet në një moment kur qytetarë po shprehin publikisht shqetësimet dhe pritshmëritë e tyre në mënyrë paqësore. Në respekt të pozicionit kushtetues dhe neutralitetit kushtetues, mund të theksoj se e drejta për t’u shprehur dhe për të marrë pjesë në jetën publike është një vlerë e mbrojtur nga Kushtetuta, e cila duhet të ushtrohet në pajtim me Kushtetutën dhe ligjet e vendit”, deklaroi Begaj.
Deklarata e Presidentit vjen në një kohë kur protestat në Tiranë kanë hyrë në javën e katërt dhe kur një pjesë e kërkesave të protestuesve kanë marrë karakter politik, duke përfshirë dorëheqjen e qeverisë dhe zhvillimin e zgjedhjeve të parakohshme.
Megjithatë, kreu i shtetit nuk komentoi mbi kërkesat konkrete të protestuesve, por riafirmoi të drejtën e tyre për të shprehur në mënyrë paqësore pakënaqësitë dhe qëndrimet publike.
Discussion about this post