“Bëhu burrë!”, Rusia inkurajon qytetarët t’i bashkohen ushtrisë

Një fushatë e gjerë reklamuese duket se ka nisur në Rusi duke u bërë thirrje qytetarëve të bashkohen me ushtrinë.

Kjo vjen pasi forcat e armatosura ruse kanë pësuar humbje të mëdha dhe kanë luftuar për të bërë përparim në Ukrainë prej më shumë se një viti, pasi e pushtuan atë.

“Ti je burrë. Bëhu burrë!,”- thotë një reklamë e Ministrisë së Mbrojtjes që u bën thirrje rusëve të bashkohen me ushtrinë.

Ministria e Mbrojtjes në Moskë publikoi një video duke u bërë thirrje rusëve që të heqin dorë nga punët e tyre civile dhe të lidhin kontratë me ushtrinë.

Videoja paraqet një roje supermarketi, një instruktor fitnesi dhe një shofer taksie, të gjithë me sa duket të zhgënjyer nga jeta civile dhe e përmbushin jetën duke ju bashkuar ushtrisë.

Videoja premton një pagë mujore prej të paktën 204,000 rubla (2,500 dollarë, 2,000 £), katër herë më shumë se mesatarja e Rusisë.