“Bëjeni punën tuaj”, Yuri Kim e prerë në takimin me gjyqtarët e Apelit të GJKKO

Kanë dalë detaje nga takimi që zhvilloi ambasadorja e Shteteve të Bashkuara të Amerikës Yuri Kim me gjyqtarët e Apelit të GJKKO.

Kryediplomatja me mision në vendin tonë i falënderoi përfaqësuesit e drejtësisë për punën e tyre të madhe dhe ka theksuar se duhet të bëjnë punën me ndershmëri, duke zbatuar pa mëdyshje ligjin, me guxim dhe krenari.

Postimi i ambasades amerikane:

“Nuk mund të theksojmë mjaftueshëm rëndësinë e një gjyqësori të drejtë, të paanshëm dhe të guximshëm, jo vetëm për popullin shqiptar, por edhe për miqtë dhe aleatët e tyre. Shqipëria po ecën përpara, jo pa vështirësi, por megjithatë po ecën. Rruga përpara, është e vetmja rrugë për të moshuarit shqiptarë, të cilët nuk hoqën kurrë dorë nga shpresa dhe për djemtë dhe vajzat e reja, të cilët kanë aq shumë nevojë për të. E nxis çdo gjyqtar dhe prokuror të këtij vendi që ta bëjë punën e tij me ndershmëri, duke zbatuar pa mëdyshje ligjin, me guxim dhe krenari. Ne do të qëndrojmë krah jush, do të vazhdojmë të luftojmë bashkë me ju”.