Anëtari i kryesisë së Partisë Demokratike të vulës, Roland Bejko, tha në emisionin “Të Paekspozuarit” në MCN TV, se në mbledhje u diskutuan detajet e zgjedhjeve që priten të mbahen për kryetarin e PD-së në 29 korrik.
Ai nuk pranoi se Basha është një kandidat edhe pse me daljet e tij publike së fundmi, Lulzim Basha ka treguar se do të përpiqet të rikthehet në krye të partisë së vulës me çdo kusht, duke përdorur ndjekësit që i kanë mbetur brenda forumeve të partisë.
“Mbledhja po zhvillohet për të vendosur modalitetet për zgjedhjet. Anëtarët e kryesisë nuk kanë njolla tenderash, bashkëpunim me oligarkët. Nuk janë oligarkia e haviarit.
Po diskutohen modalitetet e zgjedhejve. Po diskutohet rregullorja me te cilën do të punohet në zgjedhje. Do të diskutohet plotësimi i vakancave të komisionit të zgjedhjeve.
Na iku një muaj kot duke u marrë me retorikë të brendshme, ndërkohë duhet të ishte mbledhur kryesia”, deklaroi Bejko.
Gjatë debatit në studio, Bejko pranoi se në disa raste Basha i ka dalë nga fjala, por theksoi se duhet pasur parasysh teoria e Makiavelit.
“Unë do shoh se kë do mbështes, qoftë edhe në rastin e Bashës, do shoh platformën e tij apo të kandidatëve”, tha Bejko. Sipas tij, Basha dhe Berisha kanë qenë bashkë deri në shtator 2021, kohë kur u morr vendimi nga kryetarit i PD së asaj kohe.
Bejko tha se nuk ka ndërmend të bëjë avokatin e Bashës, por sqaroi se ai grupi që e mbështeti gjatë fushatës ishin gjithashtu mbështetës të ish-kryetarit të PD.
Discussion about this post