Roland Bejko, ish-kandidat për Kryebashkiak i Tiranës në zgjedhjet e 14 majit, dhe pjesë e grupimit që drejtohet nga Lulzim Basha në PD, e konsideroi si legjitim mbajtjen e Kuvendit Kombëtar dhe miratimin e ndryshimeve statutore.
Për Neës24, Bejko tha se PD u paraqit me ekipin e saj dhe se dje ka hyrë në fuqi statuti i ri, duke bërë që kryetari i partisë të jetë njëkohësisht edhe kreu i grupit parlamentar, dhe se për këtë nuk ka asgjë për të diskutuar.
“Deputetët janë ndarë tashmë në tre grupe, në fakt është dhe një grup i katërt. Deputetët që e njohin PD zyrtare ishin, ata që nuk e njohin nuk ishin dhe nuk votuan. E patë që u tund pallati i sportit? Mbi 4 mijë vetë kanë qenë aty”, tha Bejko.
Bejko deklaroi se ka respekt për disa deputetë që mbështetën dhe mbështesin Berishën, por ofendoi ata që sipas tij kalojnë nga një krah në krahun tjetër.
“Nuk është çështja ku do ta ketë karrigen një deputet. Është personale, janë në të drejtën e tyre. Është imorale sepse lanë një kauzë dhe përqafojnë në emër të shumicës…Gjëmat në emër të shumicës janë bërë. Ta lënë popullin. Unë kam respekt për Edi Palokën, kam respekt për Flamur Nokën, dy miqtë e mi pavarësisht pozicioneve të kundërta që kemi, sepse u treguan burra dhe dolën që në fillim. i kishin detyrime Sali Berishës, ndoshta mendonin dhe si Sali Berisha dhe i dolën në krahë”, tha ai.
Discussion about this post