Kryebashkiaku i zgjedhur i Himarës, Fredi Beleri, akuzon Kryeministrin Edi Rama se kontrollon gjyqësorin, madje duke i dhënë edhe udhëzime.
Beleri ka reaguar ndaj deklaratave të dy ditëve më parë nga Kryeministri Edi Rama, i cili e konsideroi çështjen ndaj kryebashkiakut të zgjedhur si një çështje të drejtësisë, duke shtuar se tashmë askush nuk e kontrollon këtë sistem, sikundër ndodhte me atë që kreu i qeverisë e quan si “drejtësia e vjetër”.
“Kryeministri shqiptar Edi Rama, për të disatën herë në shtatë muajt e fundit, me ndërhyrjet e tij politike dirigjon drejtësinë shqiptare.
Në mënyrë të pavërtetë, deklaron se jam arrestuar në flagrancë për shitblerje votash. Gjykata ende nuk ka vendosur për rrethanat reale të arrestimit tim, ndërsa unë vetë kam paraqitur ankesë në gjykatë lidhur me arrestin në flagrancë, ankesë e cila ende nuk është shqyrtuar nga gjykata kompetente.
Nga ana tjetër, z. Rama udhëzon gjyqtarët dhe deklaron se ka qenë në kushtet e flagrancës”, tha Beleri.
Në vijim ai “pyet nëse e ka parë ose jo videon e arrestimit tim, e kapur rastësisht nga kamera e një restoranti në shëtitoren e Himarës? A e pa që unë po bisedoja me avokatin dhe kushëririn tim?”
“Ndërhyrja e z. Rama është shkelje e prezumimit të pafajësisë, siç qartësisht përcaktohet në nenin 6 par.2 të Konventës Evropiane për të Drejtat e Njeriut. Le ta kuptojë që derisa të provohet nëse jam ose jo fajtor, prezumohem i pafajshëm.
Këtë herë, Edi Rama nuk nguron të ndërhyjë edhe në çështjen e betimit tim, çështje e cila pritet të shqyrtohet. Deklaron fjalë për fjalë, duke iu referuar personit tim: “Ai nuk mund të betohet, pasi ligji ynë është shumë i qartë për kushtet në të cilat kryhet betimi”.
Deri më tani na trumbetonte se është drejtësia ajo që do të vendosë dhe se ai vetë nuk dëshiron të ndikojë në vendimin e gjykatës. Duke qenë se tani e sheh që seanca lidhur me shqyrtimin e kërkesës sime për kryerjen e betimit do të zhvillohet më 4 dhjetor 2023, po ndryshon taktikë. Ai i urdhëron gjyqtarët të shqyrtojnë kushtet në të cilat kryhet betimi dhe paragjykon vendimmarrjen e tyre. Në këtë mënyrë, imponon gjykatën që të më ndalojë të betohem.
Le të tregojë vetëpërmbajtje, siç i takon për postin që mban. Në fund të fundit është kryeministër! Le të sillet si i tillë!”, shkruan Beleri.
Prej 12 majit, dy ditë para zgjedhjeve, Beleri ndodhet i izoluar në paraburgim ndërsa në GJKKO ka nisur gjykimi ndaj tij me akuzën e korrupsionit në zgjedhje. Sipas SPAK, Beleri ka blerë vota për zgjedhjet e 14 majit, ndërkohë që kryebashkiaku i zgjedhur i konsideron akuzat si politike.
Çështje Beleri ka krijuar tensione mes Athinës dhe Tiranës zyrtare, ndërsa Greqia ka paralajmëruar se do të bllokojë Shqipërinë në rrugën e integrimit.
Discussion about this post