Kryebashkiaku i zgjedhur i Himarës, Fredi Beleri ka ankimuar vendimin e Gjykatës së Posaçme që e dënoi me dy vite burgim për blerje votash.
Mësohet se Beleri ka dorëzuar dosjen në Apelin e Gjykatës së Posaçme ditën e premte dhe pritet te hidhet shorti për t’u caktuar trupa gjykuese.
Arrestimi i Fredi Belerit ndodhi në 12 Maj, dy ditë para zgjedhjeve lokale të vitit të kaluar. Më 5 mars ai u dënua nga GJKKO me dy vite heqje lirie duke u shpallur fajtor për veprën “korrupsion aktiv në zgjedhje”.
SPAK ka pretenduar se ka provuar tej çdo dyshimi se ai i kishte ofruar një bashkëpunëtori të policisë 50 euro për çdo votë që mund të gjente në favor të tij si kryetar i Bashkisë së Himarës.
Vetë Beleri ka mohuar akuzat duke u shprehur se është goditur politikisht nga kryeministri Edi Rama, në mënyrë që ky i fundit të mbajë pushtetin në Himarë.
Që prej arrestimit, Fredi Beleri qëndron në burgim, duke mos u lejuar nga gjykatat që të betohet si kryebashkiak i Himarës.
Discussion about this post