GJKKO la në fuqi masën e sigurisë “arrest me burg” për Fredi Belerin, kryebashkiakun e zgjedhur të Himarës, në zgjedhjet e 14 majit, si kandidat i koalicionit “Bashkë Fitojmë”.
Ndaj Belerit më herët Gjykata e Vlorës kishte caktuar të njëjtën masë sigurie, ndërsa çështja i kaloi për hetime SPAK.
Sipas raportimeve, gjatë seancës së zhvilluar, Beleri ka kërkuar drejtësi.
Pas vendimit të shkallës së parë të GJKKO, avokatët e Belerit thanë se do të ankimonin vendimin, duke iu drejtuar Apelit të GJKKO.
“U la vendimi që dha Gjykata e Vlorës, u lejua vazhdimi i arrestit me burg. Ne patëm pretendimet tona, Fredi Beleri kërkoi vetëm drejtësi nga gjykata duke mos e pranuar gjykimin që është ngritur për të. Nesër, do të ushtrojmë të drejtën e ankimit në Gjykatën e Apelit”, u shprehën avokatët pas seancës së masës së sigurisë.
Gjithashtu GJKKO vendosi të njëjtën masë sigurie edhe për Pandeli Kokaveshin, i konsideruar si bashkëpunëtor i Belerit në blerjen e votave në Bashkinë e Himarës.
Arrestimi i tyre është bërë dy ditë para zgjedhjeve të 14 majit, pasi akuzohen për blerje votash.
Discussion about this post