“Beleri”, mediat greke: Po hante kur u arrestua, nuk po blinte vota

Ditën e enjte, më datë 14 shtator, Gjykata Speciale për Korrupsionin dhe Krimin e Organizuar ka caktuar seancën e parë paraprake, në kuadër të gjykimit të kryebashkiakut të Himarës, Fredi Beleri dhe Panteli Kokaveshi, të cilët akuzohen për “korrupsion aktiv në zgjedhje”.

Sipas mediave greke, mbrojtja e kryebashkiakut të Himarës ka bërë dy ankimime të reja në Gjykatën e Lartë.

Nga njëra anë kërkojnë që arrestimi i tij të cilësohet si i paligjshëm dhe nga ana tjetër përgjimi i Prokurorisë së Vlorës, që lejoi fotografimin dhe video-regjistrimin e fshehtë të gjoja dorëzimit të 40 mijë lekëve për të blerë vota, të shpallet i paligjshëm.

Në të njëjtën kohë, ish-presidenti dhe ish kryeministri i vendit, Sali Berisha, doli sërish kundër qeverisë shqiptare dhe kryeministrit Edi Rama, për çështjen Beleri.

Duke folur për gazetarët, Berisha mbrojti pafajësinë e kryebashkiakut të Himarës, duke thënë se në natën që u arrestua Beleri, ai nuk po shpërndante lekë – sipas aktakuzës – por po hante në lokalin e tij.