Ish-prokurori i Krimeve të Rënda dhe avokati Eugen Beci, debatoi në emisionin “Të Paekspozuarit” me analistin Andi Bushati për akuzën e bërë ndaj Fredi Belerit për masakrën e Peshkëpisë në vitin 1994, ku Beci ishte edhe prokurori i çështjes që u mbyll pa fajtorë. Ndërsa Beci tha se ajo dosje ishte zhdukur, Bushati kundërshtoi, duke e quajtur linçim publik, kur sot Belerit të arrestuar për vjedhje votash në 12 maj i thuhet se ka bërë një krim në vitin 1994.
Pjesë nga debati:
Eugen Beci: Në Gjykatën e Tiranës kur kemi kërkuar dosjen e shpërdorimit të detyrës të ushtarakëve që duhet të ruanin repartin ushtarak të Peshkëpisë kemi gjetur një karton bosh dhe sipër vetëm shkruhej numri i matrikullit të dosjes dhe në vend të vendimit gjyqësor kemi gjetur dy fletë formati bosh.
Andi Bushati: Përse duhen këto sot?
Eugen Beci: Përse duhen. Sa i përket faktit që ky person ka qenë marrë i pandehur nga ana e Prokurorisë së Krimeve të Rënda është një situatë që nuk ka lidhje me procedurën që po ndiqet sot.
Andi Bushati: Po këtë po thonë të gjithë nëpër studio, a ka blerë vota apo jo dhe i thonë a ke bërë një krim në vitin 1994.
Ylli Rakipi: Po e ka bërë duhet të shkojë në burg. Janë fshehur materialet, thotë prokurori.
Andi Bushati: Pra, Sali Berisha duhet futur në burg për “Partizanin” se ka bërë masakër në vitin 1997. Po ngatërron kekun me byrekun, të gjitha në një vend.
Eugen Beci: Sa i përket personazhit që po hetohet nga drejtësia sa i përket rrezikshmërisë së personit, personalitetit të personit në raport me veprën penale, dua të shpjegoj. Nga mënyra se si po hetohet kjo çështje dhe si po ndikon politika, të jeni të sigurtë, se nëse shkon në Gjykatën e Strasburgut, ajo do ta bëjë telef për shkak të ndërhyrjeve politike që po ndodhin për dosjen e dytë, sepse dosja e Peshkëpisë është e kryer. Mënyra se si ndërhyn kryeministri i Shqipërisë, si ndërhyn politika, Strasburgu i quan si ndikimin indirekt ndaj gjyqtarëve dhe prokurorëve për të dënuar një person me apo pa prova, Ka shembuj konkret në një vend të rajonit ku një ministër u dënua për korrupsion dhe ministri i drejtësisë doli dhe dha deklarata se gjykata duhet ta dënojë filanin dhe gjykata e Strasburgut e ka quajtur ndikim të drejtpërdrejtë mbi drejtësinë.
Andi Bushati: Ta heqim këtë çështjen Beleri se është kjo çështja kush vesh flamur kuq e zi dhe kush vesh kostum civil. E kam parë unë këtë proces jo për Belerin, por për Beketin. Thoshin ore po ja mbyll qeveria televizionin. Thonin: Ky maskarai që ka gënjyer në vitin 1995. Të bëjnë biografinë. Këto turrat e druve të linçimit të një njeriu publik, apo personazhi që në emër të një procesi konkret i bëjnë procesin biografik, këto janë turpe jo vetëm të atyre halldupëve, prokurorëve politikë, por edhe neve këtu në studio se edhe ata në studio u shërbejnë për turrën e druve të prokurorëve politikë. Beleri akuzohet se ka blerë vota dhe unë besoj se ka patur mbrapa një shtet të madh se nuk e mundte kush Ramën në Himarë po të mos kishte Greqinë mbrapa dhe do ta merrte si gjithë Shqipërinë dhe këtu, në vend të kësaj thuhet: çfarë ka bërë ky në 1994-n? Ç’ka bërë në 2001-ishin, pra shërbejnë për të krijuar sfondin e linçimit publik.
Discussion about this post