Beleri takim “kokë më kokë” me Mitsotakis në Athinë, zbardhet biseda

Fredi Beleri ka udhëtuar këtë të hënë nga burgu i Fierit, drejt Athinës, pasi mundi të merrte lejen për t’u betuar si eurodeputet në Strasburg.

I pa shoqëruar nga efektivët, Beleri mbërriti në Athinë në rreth orës 12:30, ku u prit në një takim rreth 40 minuta nga kryeministri grek, Kyriakos Mitsotakis.

Mediat greke shkruajnë se takimi ishte i ngrohtë dhe u zhvillua në Pallatin Maximos.

Kryeministri grek e uroi Belerin duke thënë se “shpresonte që shumë shpejt ai të dalë përgjithmonë nga burgu”.

“Kam shumë arsye, i dashur Fredi, të jem i lumtur t’ju mirëpres sot në Megaros Maximos. Së pari, më lejoni t’ju përgëzoj për zgjedhjen tuaj si eurodeputet grek, në Bruksel dhe Strasburg, me Demokracinë e Re. Jam i sigurt se do t’i përmbushni plotësisht detyrat tuaja. Më lejoni t’ju them se sa i lumtur jam që kësaj aventure të madhe po i vjen fundi. Është e vetëkuptueshme, ju keni marrë licencën që të mund të ushtronit detyrat tuaja dhe të bënit betimin. Shpresoj që shumë shpejt të dilni përgjithmonë nga burgu, që ky kapitull i dhimbshëm të mbyllet për të gjithë ne, që të ecim përpara, të shohim përpara”, tha Kyriakos Mitsotakis.

Nga ana e tij, eurodeputeti Beleri falenderoi kryeministrin grek për mbështetjen e dhënë. Ai shtoi se

“Kryeministër, dua t’ju falënderoj personalisht që më keni mbështetur gjatë gjithë kësaj kohe. Unë do të nderoj besimin që më keni dhënë duke më futur në fletën e votimit për eurodeputet. Mendoj se në shtetin ku jetoj, e drejta për të zgjedhur dhe për t’u zgjedhur nuk është e vetëkuptueshme. Unë dua të ndihmoj pakicën kombëtare greke të qëndrojnë në shtëpitë e tyre të stërgjyshërve, por edhe që ky shtet të afrohet dhe të bëhet anëtar i familjes europiane”, tha Beleri.

Pas takimit me kryeministrin grek, Beleri, pritet të udhëtojë drejt Strasburgut ku do të marrë dhe detyrën si eurodeputetit.

Fredi Beleri u zgjodh eurodeputet i kandiduar nga partia e Mitsotakis, “Demokracia e Re” në zgjedhjet europiane të 9 qershorit.

Pas dënimit nga Apeli me 2 vite burg për korrupsion zgjedhor, Komisioni Qendror i Zgjedhjeve i hoqi Belerit mandatin e të zgjedhurit si kryetar bashkie në Himarë dhe më pas presidenti i Republikës shpalli zgjedhjet e pjesshme për kreun e kësaj bashkie më 4 gusht të këtij viti.