Deputeti, Belind Këlliçi, ka zbuluar sot gjatë një interviste televizive detajet për mbledhjen e Kuvendit që do të zhvillohet ditën e nesërme. Sipas tij, demokratët do të shkarkojnë me votën e tyre Lulzim Bashën dhe partia do të drejtohet nga një Komision i përkohshëm politik. Ndër të tjera, Këlliçi shprehet se çdo vendimmarrje e Kuvendit do të jetë legjitime. “S’ka si të mos njihet ky Kuvend që është i delegatëve. Këtu nesër do të ketë deputetë anëtarë kryesie, kryetar degësh, drejtës të lartë ndër vite, kryetarë bashkie. S’mund ta çoj në asnjë skutë në mendje në një skenar që lidershipi i vulës nuk njeh partinë e vetë. Unë nuk do të doja që nesër të shënohet një ditë shumë e zezë në rekordet e demokracisë botërore.
Duhet të shohim vendimmarrjen e kuvendit. Çdo vendimmarrje është legjitime e këtij kuvendi. Është Kuvendi që prevalon mbi çdo organ dhe funksion në PD. Do të ketë risi. Nga ana tjetër do të ketë mocioni për shkarkimin e kryetarit të PD-së”, tha Këlliçi.
Më tutje, ai shton se mund të ngrihet një komision i përkohshëm në menaxhimin politik të partisë. “Mund të ngrihet një komision i përkohshëm në menaxhimin politik të partisë. Po bëjmë 3 muaj që kemi hequr fokusin kryesor nga beteja me Ramën duke e fokusuar brenda partisë. Nga nesër e gjithë vëmendja do rikthehet te përballja me qeverinë. Rama çdo ditë e më shumë në pushtet i heq mundësinë vendit për të patur rritje ekonomike”, tha Këlliçi, ndërsa u bëri thirrje simpatizantëve të bashkohen nesër për të larguar qeverinë dhe për të çliruar vendin nga kjo krizë që e ka përfshirë.
Discussion about this post