Prokuroria e Posaçme (SPAK) ka thirrur ish-zëvendëskryeministren Belinda Balluku, si edhe të pandehurit e tjerë në dosjen që lidhet me ndërtimin e tunelit të Llogarasë dhe Lotit 4 të Unazës së Madhe të Tiranës, për t’u paraqitur pranë organit të akuzës të shoqëruar nga avokatët e tyre.
Procesi ka nisur këtë të mërkurë me paraqitjen e ish-drejtorit të Autoritetit Rrugor Shqiptar (ARRSH), Gentian Gjyli, i cili ndodhet në masën e sigurisë “arrest në shtëpi”. Ai mbërriti në SPAK i shoqëruar nga avokati i tij, Andi Skënderaj, si dhe nga një efektiv policie.
Burime pranë hetimit bëjnë me dije se ende nuk është e qartë nëse të pandehurve do t’u komunikohet zgjatja me tre muaj e afatit të hetimeve për veprën penale të shkeljes së barazisë në tendera, apo nëse bëhet fjalë për një tjetër veprim procedural në kuadër të çështjes.
Në listën e personave të thirrur është edhe ish-drejtori i ARRSH-së, Evis Berberi, çka ka ngritur dyshime se SPAK mund të ketë regjistruar një procedim të ri penal ose të jetë drejt komunikimit të akuzave të reja ndaj zyrtarëve nën hetim.
Organi i akuzës nuk ka dhënë ende një qëndrim zyrtar mbi natyrën e këtyre veprimeve procedurale.
Kujtojmë se, pasi Kuvendi rrëzoi me votat e mazhorancës kërkesën e SPAK për heqjen e mandatit të Belinda Ballukut, Prokuroria e Posaçme njoftoi se kishte zgjeruar hetimet ndaj saj edhe për veprat penale të korrupsionit dhe pastrimit të parave. Në kuadër të këtij hetimi u sekuestrua edhe një vilë në Dhërmi, e regjistruar në emër të ish-futbollistit Igli Tare, për të cilën SPAK dyshon se është pronë e fshehur e Ballukut.
Discussion about this post