Benet Beci, kryetari i bashkisë Shkodër, po shpenzon 130 milionë lekë për të blerë zhavorr dhe asfalt. Ndërkohë, lufta për ta marrë fondin ka pasur prapaskenat që dëmtojnë procedurën e prokurimit.
Bëhet fjalë për tenderin me numër reference REF-98379-03-13-2024 dhe objekt ‘Blerje zhavorr, stabilizant, binder, asfalt etj”. Menjëherë, Open Data Albania e ka klasifikuar me “Flamur të kuq”, që tregon riskun e korrupsionit. Kishte edhe kompani të tjera që u ofruan për të konkurruar, por Beci nuk i ka lejuar të vazhdojnë garën duke i skualifikuar.
Dy nga tre oferta të paraqitura u përjashtuan që në fazën e parë me argumentin se nuk kanë paraqitur raport analizë ose raport testimi për mallrat.
Në këtë pjesëmarrësit duhet të lajmërohen për mungesat që kanë në dokumentacione dhe t’i plotësojnë.
Kshtu kryetari Beci ka dhënë menjëherë fitoren firmës “SMO VATAKSI” SHPK, në pronësi të Xhevat Vataksit. Ky biznesmen është përmendur më parë se ka përfituar tendera pa konkurrencë i favorizuar nga zyrtarët.
Tenderat e Xhevat Vataksit dhe dosjet penale
Xhevat Vataksin, qysh në kohën e kryebashkiakes Voltana Ademi është furnizuar mirë me tendera pa garë. Por, ai është bërë edhe pjesë e dy skandaleve në 2018 dhe në vitin 2020.
Në muajin maj të vitit 2018, firma e tij ishte duke ndërtuar rrugën Shkodër – Velipojë. Për shkak të një mosmarrëveshje me pronarët e tokave, ndaj Vataksit u qëllua me armë. Një atentat që kishte për qëllim eliminimin e biznesmenit, por fatmirësisht 3 nga plumbat e prekën vetëm në gjymtyrët e poshtëm. Më herët Xhevat Vataksi është akuzuar se ka përfituar dhjetëra tenderë klientelistë nga kryebashkiakët e mëparshëm.
Ndërsa në vitin 2020 kujtojmë se bëri bujë në media lajmi që policia arrestoi Xhevat Vataksin, 62 vjeç, banues në Shkodër, për veprën penale “Dhënia ndihmë për ndërtim të paligjshëm” dhe Afërdita Basha, 48 vjeçe, banuese në Tiranë, për veprën penale “Shpërdorimi i detyrës”.
“Mbi bazën e këtyre fakteve Prokuroria pranë Gjykatës së Shkallës së Parë Durrës është drejtuar me kërkesë në Gjykatë për caktimin e masave të sigurimit ndaj tyre dhe me datë 14.10.2020 është bërë ekzekutimi i masave të sigurimit të caktuara ndaj shtetasve ,Xhevat Vataksi, Agron Hasa, Kastriot Braha , Aferdita Basha, Dhurata Lazaj, Astrit Zenelaj, Spartak Tarka, Lek Tushaj, Rezart Arkaxhiu.
Dhe një herë shprehim vendosmërinë e Prokurorisë pranë Gjykatës së Shkallës së Parë Durrës për zbatimin me korrektësi të ligjit me qëllim vënien para përgjegjësisë penale të gjithë atyre punonjësve shtetëror të cilët në mënyrë të kundraligjshme përfitojë nga funksioni që i është dhënë dhe nxjerrin përfitime materiale për të tretët ose për vete duke dëmtuar pasurinë shtetërore dhe duke sjellë pasoja të rënda për interesat e shtetit dhe të shtetasve në përgjithësi“, thuhet në njoftimin zyrtar të prokurorisë në atë kohë.
Por edhe pas këtij arrestimi, Vataksi ia hodhi paq dhe tashmë vazhdon të jetë i favorizuar në tendera pa garë.
©️Copyright Gijotina.com
Ky artikull është ekskluziv i Gijotina.com, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar Gijotina.com dhe në fund të vendoset linku i burimit, në të kundërt çdo shkelës do të mbajë përgjegjësi sipas Nenit 178 të Ligjit Nr/ 35/2016.
Discussion about this post